Lo cap del Partit Socialista espanhòl (PSÒE), Pedro Sánchez, serà uèi investit president del govèrn, tras que probablament. E mai Sánchez aguèsse pas la majoritat absoluda dins lo vòte d’investidura de dimenge passat, uèi se tornarà votar e una majoritat simpla li permetrà d’èsser investit president. Per obténer pro de vòtes favorables e d’abstencions, e solament lo vòte contrari del Partit Popular, de Ciutadans e de Vox, a degut far de paches amb qualques partits politics. Avèm ausit fòrça a parlar del pache qu’a fach amb los independentistas catalans d’ÈRC, mas i a un autre pache que volèm soslinhar tanben dins aquesta informacion: l’acòrdi del PSÒE amb lo Blòc Nacionalista Galèc (BNG) permetrà que las ràdios e las televisions portuguesas atengan Galícia.
 

Lo vòte favorable del deputat nacionalista galèc, Néstor Rego, permetrà uèi que lo cap del Partit Socialista espanhòl PSÒE, Pedro Sánchez, siá investit president del govèrn espanhòl. Per obténer aquel vòte, lo Blòc Nacionalista Galèc (BNG) a demandat al PSÒE que s’engatge a daissar las ràdios e televisions portuguesas aténher Galícia. Èra una mesura ja prevista dempuèi 2014 que s’èra pas jamai concretizada.
 
Totes los galeguistas, tant los partisans de l’unitat lingüistica galaicoportuguesa, coma los que penson que son de lengas diferentas, creson que galèc e portugués an un aujòl lingüistic comun e que, per tant, la difusion dels mèdias portugueses en Galícia es un biais excellent de promòure la lenga del país.
 
De fach, la television regionala de Galícia (TVG) ten ja un acòrdi amb la television publica de Portugal (RTP) que prevei la realizacion ensems de contenguts de ficcion e de divertiment.
 
En mai d’aquò, l’acòrdi prevei tanben la modernizacion de la linha ferroviària entre Vigo e la frontièra portuguesa e una reduccion dels peatges de l’autoestrada que va en Portugal.
 
 

Espanha: Acordo para governação de Espanha prevê que televisões e rádios portuguesas sejam emitidas na Galiza https://t.co/4pbY3pYiPK

— Público (@Publico) January 4, 2020