Los incendis que son a cremar Austràlia dempuèi setembre passat son "un desastre sens precedents del ponch de vista de la fauna" segon l'ecològ de l'Universitat de Sydney, Chris Dickman. Solament dins l'estat de Nòva Galas del Sud, lo que ten mai de populacion umana, se compta environ 480 milions d'animals mòrts a causa del fuòc, una donada que compren pas los insèctes, los peisses, las granhòtas ni qualques mamifèrs coma las ratapenadas, çò rapòrta la BBC.
 
Segon lo scientific, las bèstias que son pas mòrtas a causa de las flamas, an fugit o son mòrtas per manca de noiridura. A mai, qualques unas "se son enterradas per fugir lo fuòc mas en tornant a la superfícia tròban pas a manjar mas de predators que las espèran".
 
Mas la donada seriá encara pus esglasianta se l'extrapolam a tota Austràlia. Los incendis an brutlat 36 000 km² de la Nòva Galas del Sud, mas dins tot lo país s’es cremat 50 000  km²; es per aquò que, totjorn segon Dickman, i auriá benlèu un miliard d’animals tuats.
 
Ça que la, la donada pus grèva es que se tracta d'ecosistèmas isolats que serà fòrça complicat de restablir:  "I a de reptils o de mamifèrs qu'an pas grand capacitat de se mòure. E es probable que tornen pas jamai". A mai, una part plan importanta de las espècias australianas son endemicas e se tròban solament aquí, coma los cangorós, los coalas, los vombats o los diables de Tasmania.
 
Los coalas son l'espècia pus afectada, se calcula que en serián mòrts aperaquí 80 000 e que lo 30% de lor territòri es de tot en tot cremat. Los cangorós son mai rapids e maites an agut mai d'astre a l'ora de fugir las flamas. Mas la pèrda en flòra e fauna dins un país amb tant d'espècias endemicas es un desastre de las consequéncias imprevisiblas.