Las tribunas del Molin, part del patrimòni lesinhanés
 
Aqueste dimenge, a Lesinhan de Corbièras, s’inaugurava la tribuna novèla que pren la plaça de l’anciana tota de fusta qu’anava sus sos cent ans e que foguèt victima d’un incendi en julhet de 2018.
 
De matin, los Dragons Catalans s’entraïnèron sul terren del Molin. A 11 oras, se tenguèt l’inauguracion oficiala. Lo sosprefècte de Narbona rapelèt las partidas de XIII que seguissiá dins son enfança a l’Estadi Velodròm de Marselha en dobertura dels rescontres de l’OM. Mencionèt que jogava al gòlf amb una legenda del XIII: Joan Dòp. La conselhièra departamentala Valeria Dumontet sotalinhèt lo ròtle d’integracion locala que constituiguèt lo XIII per sos filhs quand la familha arribèt d’una autra contrada. Lo Prince Petit del XV, Didièr Cordoniou, vicepresident de la Region Occitània-Pirenèus-Mediterranèa ramentèt los diluns de matin dins son agéncia de la Caissa d’Estalvis ont se fasiá mai lo bilanç de la dimenjada dels dos rugbis que la tenguda dels comptes. Lo cònse de Lesinhan e ancian capitani del XIII de França, Miquèl Maïque, sotalinhèt l’importància de l’espòrt e del XIII coma factor d’identitat territoriala. I agèt un brave dinnar amb mai de 700 personas e un fuòc d’artifici clavèt la jornada.
 
Una sola causa venguèt demesir la jòia de la capitala de Corbièras: lo debanament del dèrbi entre l’FCL e Limós. Se los locals dobriguèron la marca amb un ensag d’alièr sus un despart costat tampat aprèp una mesclanha, lo primièr temps virèt a l’ avantatge dels vesitaires que marquèron tres ensages per menar 18-6 a la pausa. Los molinièrs tornèron mai determinats e marquèron dos ensages per ragantar los limosencs. Mas lo vam e la solidaritat dels Roge e Negre prenguèt lo pas sus l’indisciplina e lo jòc estereotipat e sens engenh dels lesinhaneses: doas penalitats e un ensag assegurèron la victòria dels caps de fila del classament de l’Elèit 1: 28-18. Los davants limosencs, a l’entorn del capitani Herold e los dos australians: l’arrièr Santo amb sas corsas susprenentas e lo dobertura Shaun Nona per son jòc al pè se son meses en abans.
 
 
Los Tigres d’Albi sortisson las urpas
 
Albi es l’esquipa en forma del moment. Aprèp la victòria a Carcassona abans Nadal, los albigeses an fait plegar dissabte de ser los Dragonets: 30-22. Avinhon demòstra sas pretensions en s’impausant a Sent Gaudenç 25-12. Vilanòva domina Palau: 50-18; Carcassona va ganhar a Tolosa 48-10: una partida que serà tanben a l’aficha dels 16ns de finala de la Copa aquesta dimenjada.
 
 
Torn de Copa
 
En cap d’aficha d’aqueste torn de Copa, l’autra partida entre formacions d’Elèit 1: Vilanòva-Limós. Palau ensajarà de beneficiar de l’avantatge del terren per eliminar Avinhon. Los Dragonets jogaràn cò de lors vesins d’Elèit 2: Pià.
 
 
 
 
Alan Roch