L’arrestacion d’Aurore Martin per la polícia francesa, en compliment d’un mandat d’arrèst europèu de la justícia espanhòla, e lo sieu transferiment a Madrid, ont es estada un mes e mièg en preson, generèron una enòrma polemica dins l’estat francés al començament de novembre. Espanha reclamava Martin per èsser dirigenta de Batasuna, organizacion considerada terrorista e illegala dins l’estat espanhòl mas completament legala dins l’estat francés. Martin, qu’es ciutadana francesa, foguèt liberada dissabte passat jos una caucion de quinze mila èuros.
 
Segon lo sieu avocat, la justícia espanhòla a acceptat, fin finala, la demanda de liberacion. La caucion es estada pagada mercés a la colleccion de fonzes mejançant d’activitats de tota sòrta menadas per de collectius independentistas del Bascoat francés, amassats jol nom de Bake Bidea (lo Camin de la Patz).
 
 
L’arrestacion
 
La militanta basca foguèt arrestada lo 1r de novembre per de gendarmas pendent un contraròtle estradièr. Foguèt liurada sul pic a las autoritats espanhòlas, que n’avián sollicitada l’extradicion, acceptada arunan pel tribunal de Pau (Bearn). Èra lo primièr còp qu’un tribunal de l’estat francés acceptava d’extradir un membre de Batasuna de nacionalitat francesa. Lo jutge de l’Audiéncia Nacionala espanhòla, Pablo Ruz, la mandèt en preson après li imputar un delicte d’integracion en banda armada en gra de dirigenta.
 
 
Polemica en França
 
La decision del govèrn francés foguèt refusada tant pels politics d’esquèrra coma pels de drecha, e quitament tres parlamentaris del partit del president François Hollande critiquèron lo ministre de l’Interior, Manuel Valls, per complir un mandat d’arrèst europèu qu’aviá pas aplicat lo sieu predecessor del govèrn Fillon, del temps del president Sarkozy. Valls respondèt a las criticas en disent qu’el aviá pas agut res a veire e que l’aplicacion del mandat d’arrèst espanhòl èra automatica. L’afar foguèt portat a totes los informatius e jornals de l’estat francés.
 
Divèrsas associacions se demandèron cossí èra possible qu’una ciutadana francesa, membre d’un partit legal en França, poguèsse èsser liurada a las autoritats espanhòlas solament pel fach qu’en Espanha avián decidit d’illegalizar aquel partit.
 
En mai d’aquò, i a la circonstància que l’actual president de la republica, François Hollande, aviá participat abans son eleccion a una manifestacion en 2011 contra la persecucion d’Aurore Martin per Espanha.