Lo Parlament Europèu prevei que lo presonièr politic catalan, Oriol Junqueras, poirà prene possession de son sèti coma deputat europèu a la sesilha del 13 de genièr que ven, coma los elegits en exili Carles Puigdemont e Toni Comín. La cambra li reconeis l’immunitat, coma o faguèt la Cort de Justícia de l’Union Europèa lo 19 de decembre, e contraditz la Comission Electorala espanhòla, que divendres passat decidiguèt de li levar la condicion d’eurodeputat. Dins un comunicat, l’eurocambra assegura que los tres elegits son reconeguts deputats europèus dempuèi julhet passat.
 
Carles Puigdemont e Toni Comín son ja eurodiputats. Lo Parlament Europèu lor donèt las acreditacions definitivas qualques oras après la publicacion d’aquel comunicat.
 
Mentretant, la drecha espanhòla a reagit. Lo Partit Popular, Ciutadans e Vox an denonciat una “ataca contra la sobeiranetat de l’estat espanhòl”. Lo Partit Popular a exigit del president de l’eurocambra, David Sassoli, “qu’assumisca e que respècte la decision de la Comission Electorala” espanhòla. Ciutadans a demandat al president del parlament que rectifique e que “respècte l’accion de la justícia espanhòla”. De son caire, Vox a acusat Sassoli de “prevaricacion” en assegurar que “Brussèlas pòt pas calcigar” la sobeiranetat d’Espanha.