L’escandal pel lamentable estat de la preson occitana de Lei Baumetas, plaçada dins la vila de Marselha, es arribat al pus naut de l’Estat francés. Lo Conselh d’Estat a ordenat una operacion de desratacion massissa per netejar e desinfectar aquel centre penitenciari e ne melhorar las condicions igienicas. Segon aquel naut organisme francés, cal menar a tèrme aquela operacion abans dètz jorns, çò que demòstra l’urgéncia e l’estat critic de la preson. Segon lo vejaire del Conselh d’Estat, la situacion miserabla de Lei Baumetas es “illegala” perque atempta contra las libertats fondamentalas dels presonièrs que i son clauses.
 
La mesura es estada presa après la denóncia de l’Observatòri Internacional de las Presons (OIP) contra Lei Baumetas. Dins aquel sens, aquel organisme internacional a avertit tanben que l’estat de las installacions electricas es tan deficient que i a lo risc d’incendi e a denonciat que i a pas d’accès a l’aiga potabla dins totas las cellulas. L’OIP a reclamat tanben una inspeccion sanitària dins totas las cellulas, mas lo Conselh d’Estat o a declinat en considerar qu’“es pas necite”.
 
Fa mai de vint ans que s’acomolan las denóncias pel marrit estat igienic de Lei Baumetas, sens que l’Estat aja jamai entreprés cap de mesura per o melhorar. Per exemple, en 2006, lo Conselh d’Euròpa qualifiquèt la preson marselhesa de “luòc fastigós”. I a un projècte per renovelar lo centre qu’auriá d’èsser alestit en l’an 2017, malgrat que son pas paucas las voses que creson que la sola solucion n’es la demolicion.



_____
Galariá de fòtos publicada per Libération