Del 9 al 12 de març de 2020, 18 escolans de Terminala e de Primièra qu’estúdian l’occitan al Licèu Claudi Nougaro de Montelhs (Carcin Blanc), acompanhats per lors professors d’occitan e d’istòria geografia, an montat un projècte de viatge pedagogic, per los menar en Val d’Aussau (Bearn), a Beòst. Aquel viatge s’inscriu dins un objectiu BAC, ont l’accent es botat sus la nocion d’espacis e d’escambis.
 
Dins l’encastre d’un partenariat amb David Bordes, acompanhaire en montanha e contaire pirenenc, los occitanistas van descobrir lo mitan lingüistic e cultural bearnés. Lo programa prevei una vesita en occitan en çò d’un pastre. Puèi los liceans auràn una leiçon d’esquí e fabricaràn d’iglós a l’estacion d’Artosta, en tot seguir las indicacions en lenga d’òc. De ser, serà l’escasença d’escotar David nos contar qualques istòrias. Lo jorn seguent serà mai endurant, que los escolans se passejaràn en raquetas tota la jornada, al Còl del Portalet, e lor esfòrç serà recompensat per un menut tradicional, servit al restaurant Chez Trey. Enfin, lo darrièr jorn, los joves occitanofòns seràn sensibilizats, en lenga occitana, a la recèrca de victimas en montanha a l’estacion de Goreta.
 
Per fin qu’aquel projècte se realize, los liceans s’investisson e cèrcan tre uèi a demesir la part de pagar per las familhas. Aital, aurà luòc lo 25 de genièr, a la sala Bonnaïs a Cauçada (Carcin Blanc), una brocanta de 8h a 17h, ont los escolans vendràn d’objèctes e ont se pòt reservar una plaça per 7 èuros tre ara. A 19h, se tendrà lo repais, aprestat amb de produches fresques e locals, per 12 èuros e sus reservacion sonque. Al menut, vos serà prepausat una ensalada de gresièrs, seguida d’un aligòt salsissa, puèi de pastissons e un cafè, acompanhat de pan e d’un veire de vin. Lo balèti començarà a 20h amb Manu Isopet a l’acordeon e lo jove Guilhèm a la boha. Tot del long, los liceans s’ocuparàn de servir, a pichon prètz, bevenda, pastissariá e entrepans.
 
Venètz seguir totas las estapas e l’avançada d’aquel projècte sul blòg pedagogic, tengut pels escolans.
 
 
 
 
Linda de Lorenzo
 

 
 



    

fffff		fffff
	Jornalet a l'escòla Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a. Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…