La polícia francesa es intrada aqueste diluns passat dins la Tor deu Borrèu, a Pau, en petant la pòrta, emportant la sòno e levant una bandeiròla . Sièis militants que se trobavan dedins son estats arrestats e menats al comissariat. Malgrat que Libertat, l’organizacion de l’esquèrra revolucionària occitanista que gerís lo sit, siá estada perseguida mai d’un còp per la polícia, una ataca d’aquesta mena èra fins ara inedita. Mas  sembla que, “ara jos Macron”, la polícia a carta blanca, segon çò que diguèt un policièr a un dels detenguts.
 
Pau aculhiguèt diluns passat la reünion del G5 Sahel, çò es la coordenacion politica entre los estats de Mauritània, Mali, Burkina Faso, Niger e Chad. L’eveniment comprenguèt la vesita del president francés, Emmanuel Macron, e faguèt venir inaccessible lo quartièr pus central de la capitala de Bearn, dich “deu Castèth”, ont solament i podián accedir a pè los que i demòran, i trabalhan o quaques jornalistas acreditats. Libertat denonciava ja un “estat de sètge” dins lo quartièr.
 
Macron encara demorèt dimars dins la capitala de Bearn per inaugurar tornarmai lo primièr autobús electric de la vila sonat Fèbus, que foguèt ja inaugurat ja en setembre passat e ont la preséncia de l’occitanisme faguèt parlar en occitan lo cònsol màger palés, François Bayrou.
 
 
“Ara jos Macron avèm totes los dreches”, ço ditz un policièr
 
Segon lo comunicat difusat per Libertat, protestavan contra lo sètge del centre vila de Pau e la vesita de Macron. Pengèron una bandeiròla e difusavan de musica engatjada e d’eslogans politics. Foguèron atacats e amudits sul pic amb una violéncia de las autoritats estatalas que s’èra pas jamai vista.
 
Puèi, los de Libertat poguèron constatar que cinc policièrs en civil cercavan d’intrar dins lor local, e vegèron en seguida arribar una cinquantena de policièrs, tant en unifòrme coma en civil, que s’acampèron davant lo local en ocupant la plaça e las carrièras amb lors forgons. Los agents arranquèron una aficha de la paret del local abans d’esclatar la pòrta. Segon lo comunicat de Libertat, avián pas cap de mandat ni d’arrestat qu’auriá exigit que lor dobriguèsson. Pasmens, al moment que dedins viravan la clau per dobrir, los agents petèron la sarralha per mejan d’un còp sus la pòrta en tot rompre a l’encòp pòrta e sarralha.
 
Los militants foguèron arrestats e menats al comissariat per “tapatge diürne”, per “otratge” e quitament per “rebellion”.
 
Los detenguts rapòrtan una violéncia extrèma de part dels policièrs, sustot verbala. Un d’eles planguèt qu’èran dins lor local e que lor avián desfonzat la pòrta: “Cresi qu’avèvan pas lo dreit”, çò diguèt. Los dos agents presents li respondèron: “Ara, jos Macron, avèm totes los dreches”.
 
Un militant explica d’aver començat de respondre als policièrs en occitan, mas lo comprenián pas brica.
 
La gàrdia a vista durèt de 17h15 a 21h.
 
Mentretant, la Tor deu Borrèu demorèt abandonada e cap de militant poguèt pas accedir a la zòna per susvelhar la pòrta rota.