Actualitats
Alsàcia votarà en referendum, en abril, sus la fusion de sos tres conselhs territorials
Se s’apròva, lo conselh regional e los dos conselhs generals del Naut Ren e del Bas Ren convergiràn en una meteissa collectivitat amb sedença a Estrasborg
Lo 24 de novembre, a Estrasborg, los membres del conselh regional d’Alsàcia e dels dos conselhs generals del Naut Ren e del Bas Ren an decidit de far de passes per crear una nòva collectivitat que remplace los tres conselhs. La decision se prenguèt dins lo nomenat Congrès d’Alsàcia, per 108 vòtes en favor, cinc en contra —los del Front Nacional— e nòu abstencions. La creacion d’una sola collectivitat dins lo territòri germanofòn d’Alsàcia, amb sedença a Estrasborg, se sometrà a referendum lo 7 d’abril que ven e, se s’apròva, intrarà en foncionament previsiblament en 2015.
Lo fuèlh de rota que lo Congrès d’Alsàcia a escrich se basa sus la lei del 16 de decembre de 2010, que permet a una region e als departaments que ne fan partida de fusionar per crear una collectivitat unica que ne gerisca totas las competéncias. Se vòl beneficiar tanben del transferiment de competéncias descentralizadas. En lo cas alsacian, los arguments de la fusion son la proximitat e l’eficacitat.
S’agís d’un país densament poblat (1,8 milions de personas), amb una superfícia relativament petita (8_280 km²). Fòrça voses consideravan que la division d’Alsàcia en dos conselhs generals èra quicòm d’anacronic e de car. Al delà de l’eficacitat e de la proximitat, se prevei que la fusion portarà un estalvi amb la reduccion d’entre 10 e 20% del nombre d’elegits e del personal. Tanben d’unes que i a pronostican que l’exemple alsacian serà seguit per d’autras regions de l’estat francés.
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Pel Baden-Württemberg, es una bona idèa, ambe l'exportacion de totes los nacional-expansionistas franceses d'Occitània (los republicanistas), per restablir lo balanç dels Alsacians exportats en Argèria.
1 / Cal esperar que las fusions se podràn far d'una autra manièra, per exemple la fusion del CR dedins las institucions del CG ... de Pirinèus-Orientals, senon res bolegarà sobre la còsta 'francesa' Oèst de la Mar Nostra.
2 / Cal esperar tanben qu'en Iparralde las causas se posquèssen far d'una autra manièra, per fabricar la famosa institucion basca ; mas aquí sembla que lo govèrn fosquèsse pas que nacional-bonapartista.. coma sempre la frustracion basca es bastida pels socialistas sul tèma...
3 / per clavar cal esperar que la refòrma aquesta se fasquèsse pas contra la politica sociala engimbrada -de façon forçada per l'Estat central çaquelà- pels CG. ; aquò podriá aital semblar a la politica del PP a Madrid.
4 / puèi per clavar, e es pas la mendra de las causas, cal esperar que lo regionalisme creat pel sistèma de la decentralizacion frenèsse pas los projectes nacionals occitans (inter-regionalitat que díson), de Niça a Bordèu, de Pau a Gap...
E quora se farà lo restacament de Léger Atlantic amb Bretanha ? Cal pas somiar ça que la (subretot quand vesèm que l'Estat francés non vòl crear un departament pel Bascoat). Mas aquò's pas çò previst de tot biais amb la lei del 16 de decembre de 2010 ... E puèi vertat es que sèm tanben al país de Pampaligòssa nosautres.
Es pas encara prevista sul calendièr de l'estat francés la fusion amb lo parlament de Baden-Württemberg ?
Aquò seriá una vertadièra abançada !
Mas bon, nos enfadarem pas: cada saut de piuse ja fait serà pas mai de far...
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari