Se presenta uèi a Pau la segonda edicion de la corsa per la transmission de la lenga occitana sonada “La Passem”. Lo Pavelhon de las Arts de la capitala de Bearn aculhirà aqueste ser a 17h30 la presentacion de l’eveniment. Es previst que los primièrs quilomètres sián crompats per cèrtas autoritats, dont la presidenta de l’Ofici Public de la Lenga Occitana, Charline Claveau-Abbadie, Monique Sémavoine, conselhièra departamentala encargada de la politica lingüística occitana, e Jean Lacosta, adjonch a la cultura de la vila de Pau.
 
La segonda edicion de La Passem se debanarà del 30 d’abril al 3 de mai amb un trajècte fòrça pus long. Durant quatre jorns e tres nuèches, los correires anaràn de Pau a Anglet, çò es mai de 600 quilomètres. La tòca es de passar per las comunas del país amb l’objectiu de far prene consciéncia de la transmission de la lenga occitana.


 
La corsa l’organiza l’associacion Ligams, que met en venda de quilomètres de la correguda per finançar l’eveniment e per amassar un fons d’argent destinat a finançar de projèctes en favor de la lenga nòstra. D’efièch, la primièra edicion de La Passem permetèt de culhir 48 000 èuros que financèron sèt projèctes.