Lo realizaire estatsunidenc Spike Lee serà lo president de la jurada de la 73a edicion Festenal de Cinèma de Canas (Vencenc), que se debanarà del 12 al 23 de mai que venon. A 62 ans, lo cineasta, scenarista, actor, montaire e productor a signat de nombroses filmes venguts objèctes de culte e a portat al cinèma contemporani los questionaments e las revòltas de l’epòca sens jamai oblidar de s’adreiçar al public qu’el a, filme après filme, sensibilizat a sas causas, çò rapòrtan los organizaires del prestigiós festenal de cinèma que l’aculhís Provença .
 
“Tot del long de ma vida los eveniment aüroses me son arribats de faiçon imprevista sens qu’o espère. Quand m’an apelat per venir president de la jurada de Canas en 2020 ne soi estat espantat, èri a l’encòp aüros, susprés e fièr”, çò a dich Spike Lee dins una longa declaracion que podètz legir entièra aicí.
 
Lo realizaire e productor estatsunidenc succedirà al cineasta mexican Alejandro G. Iñárritu, dont la jurada en 2019 autregèt la Palma d’Aur al filme Gisaengchung/Parasite, del realizaire corean Bong Joon-Ho, que venguèt lo primièr corean a ganhar lo prestigiós prèmi del festenal provençal de cinèma.
 
Lo Festenal de Cinèma de Canas es l’eveniment pus important del Mond pertocant lo cinèma, e doncas, un eveniment màger d’Occitània. Dins las doas edicions passadas Jornalet es anat sus plaça per raportar l’eveniment.