Lo rapòrt annal de Human Rights Watch (HRW) denóncia una repression mai brutala e generalizada en China, la violacion dels dreches umans en Arabia Saudita, als Emirats Arabis Units, en Qatar e a Bahrayn, e mençona Catalonha en afirmant que la justícia espanhòla condemna e encarcèra “de politics e d’activistas” catalans “per d’accions non violentas”.

Tanben lo subrenaut nombre de personas nafradas en França pels policièrs antisusmautas es mençonat pel rapòrt. L’observatòri dels dreches umans detalha que demest las personas nafradas i a de “manifestants pacifics, d’estudiants del segondari e de jornalistas”.
  
 
China: un veritable estat policièr “orwellian”
 
La situacion de China sembla lo chepic màger del rapòrt d’HRW. L’observatòri dels dreches umans avertís que las politicas d’aquel país, a l’interior e a l’exterior, son una menaça pels dreches umans e demanda que la comunautat internacionala s’unisca per arrestar Pequin.
 
Segon Kenneth Roth, director executiu d’HRW, “lo govèrn chinés emplega a l’estrange sa creissenta capacitat economica e diplomatica per far calar los critics e per realizar l’assaut pus intens contra lo sistèma global dels dreches umans qu’ajam jamai vist”. Roth, que li refusèron lo permés per vesitar Hong Kong, assegura que lo president Xi Jinping exercís la repression amb la tòca d’obténer “un contraròtle social total”.
 
Per tant, HRW demanda l’unitat internacionala per empachar que de païses coma França, Brasil, los Estats Units e Índia tengan tant de complicitat amb la repression e la censura chinesas. De soslinhar que lo rapòrt parla d’un autentic estat policièr “orwellian”, lo meteis adjectiu qu'empleguèt Jornalet per descriure lo contraròtle que lo patís lo pòble oigur. Justament, lo rapòrt mençona tanben la repression dels oigors e los maltractaments que patís aquela minoritat turquesa de tradicion musulmana.
 
 
Los abuses de las monarquias autoritàrias dins lo golf Persic
 
Quant als païses arabis del golf Persic, HRW remembra qu’aqueles païses diguèron que garentirián los dreches umans en 2019, mas que contunhan d’èsser de monarquias autoritàrias que refusan las libertats, encarcèran los dissidents e discriminan los collectius vulnerables.
 
Lo govèrn dels Emirats Arabis Units nomenèt 2019 “l’an de la tolerància”, pel qual mostrèt, segon HRW, un “mesprètz perilhós”. Lo rapòrt i denóncia “de detencions arbitràrias, de jutjaments parcials e d’autres biaisses de repression contra los dissidents pacifics”.
 
Quant a Qatar, l’observatòri internacional afirma que las reformas aprovadas per protegir los dreches umans an pas empedit que i aja totjorn una discriminacion crusèla envèrs de milièrs de femnas, de salariats migrants e de demandaires d’asil.
 
A Bahrayn, lo govèrn a executat la pena capitala sus tres personas e a mes en preson de dissidents que participavan a una manifestacion pacifica. A mai, se perseguís e se menaça d’activistas dels rets socials.
 
 
“Campanha de repression” en Arabia Saudita
 
Segon lo rapòrt, l’Arabia Saudita contunha sa “campanha de repression” contra d’activistas independents en tot soslinhar l’assassinat del jornalista Jamal Khashuqji (sovent transcrich Khashoggi) mas tanben en remarcar que i a “de dotzenas” de personas detengudas qu’afrontan de “jutjaments injustes” per aver criticat lo govèrn, compresas quatre femnas que se baton pels dreches umans.
 
A mai, HRW demplora qu’ara que las femnas de mai de 21 ans pòdon avèr un passapòrt e viatjar a l’estrange sens lo consentiment d’un òme, se detenga e se jutge las femnas que se batèron per obténer aquel melhorament.
 
 
Catalonha totjorn dins lo rapòrt d’HRW
 
L’observatòri internacional dels dreches umans citèt la repression contra los independentistas catalans dins son rapòrt de l’an passat. Ongan, ne torna parlar en mençonant la senténcia contra los nòu presonièrs politics condemnats a entre 9 e 13 ans de preson per sedicion: