Lo principal ideològ, pòrtavotz e comandant militar del grop armat indigenista mexican nomenat Armada Zapatista de Liberacion Nacionala (EZLN), Rafael Sebastián Guillén Vicente, conegut coma lo Soscomandant Marcos, emetèt divendres passat un comunicat en escasença del quinzen anniversari del masèl d’Acteal e de “l’intrada dins una nòva èra maia”.

“O avètz ausit? Es lo son de lor mond qu’es a s’esfrondrar. Es lo del nòstre qu’es a ressorgir. Lo jorn qu’es estat jorn, èra nuèch. E la nuèch serà lo jorn”, çò diguèt lo Soscomandant Marcos dins son brèu comunicat.
 
Lo messatge arribèt qualques oras après que mai de 40 000 zapatistas desfilèsson en silenci dins cinc vilas de l’estat de Chiapas, en la mobilizacion mai importanta d’aquela organizacion dempuèi lo 1r de genièr de 1994, quand l’EZLN prenguèt las armas.
 
Los participants a l’acte partiguèron de San Cristóbal, Las Margaritas, Ocosingo, San Cristóbal de las Casas, Palenque e Altamirano, dins totes los cases de foguièrs del soslevament zapatista e d’endreches ont los pòbles maias se levèron en revòlta (los tzeltals, los tzotzils, los choles, los tojolabales e los mams). S’acampèron en silenci dins las plaças principalas d’aquelas vilas.
 
Lo masèl d’Acteal foguèt executat per de paramilitars lo 22 de decembre de 1997, qu’i moriguèron 45 personas, totas de tzotzils. Lo govèrn mexican diguèt qu’èra a causa d’un conflicte etnic, e mai se l’oposicion e divèrsas organizacions umanitàrias allègan que l’incident faguèt partida de l’estrategia de defensa del govèrn en sa lucha contra l’EZLN.
 
Lo president mexican d’alavetz, Ernesto Zedillo, acusat de crimes contra l’umanitat per sa presumida implicacion en aquel masèl, viu a l’ora d’ara en Connecticut, als Estats Units.