Tres vilas de l’interior de China —Wuhan, Huanggang e Ezhou— an suspendut los servicis d’avion, de tren, d’autobús e los transpòrts estradièrs en seguida d’un novèl coronavirus (2019-nCoV). Per ara, i a 571 cases confirmats per la Comission de la Santat de China, e 17 personas son mòrtas a causa de la pneumonia causada per aquel virus.
 
Al total, vint milions d’abitants i son potencialament expausats, e la tòca d’aquela mesura es d’evitar que lo virus s’estenda a causa de las celebracions de l’An Nòu chinés que se festeja uèi, 25 de genièr. Per aquesta celebracion la populacion abitualament se desplaça per tot lo territòri. Es per aquela rason que tanben a Pequin an suspendut las festivitats. A mai, i a ja de cases confirmats a Hong Kong, Macau, en Tailàndia, a Taiwan, Singapor, als Estats Units, en Japon e Corèa del Sud.

 

Tres cases en Euròpa dont un en Occitània

Segon lo Ministèri de la Santat francés,  los primièrs tres cases de contaminacion pel coronavirus apareguts en Euròpa se venon de confirmar a Bordèu e París, çò rapòrta Le Monde.

 
Qu’es es lo novèl coronavirus?
 
Es un virus de la meteissa familha que la sindròme respiratòria aguda sevèra (SRAS) e lo coronavirus  de la sindròme respiratòria de l’Orient Mejan (MERS-COV), de malautiás que se transmeton d’animals a umans, mas que se pòdon pereu transmetre entre uman. Li dison coronavirus per la forma del patogèn e afèctan lo sistèma respiratòri, principalament los palmons, amb un risc de mòrt.
 
Los principals simptòmas son mai intenses qu’una gripa, amb de fèbre, de dolors, un malèsser general e de problèmas respiratòris. Segon çò que podèm saber a l’ora d’ara d’aquel novèl coronavirus, son periòde d’incubacion pòt durar catòrze jorns, segon lo plan de prevencion e contraròtle publicat per las autoritats sanitàrias chinesas.
 
 
Cossí es aparegut aquel novèl coronavirus?
 
Los primièrs cases apareguèron en decembre, en plena epòca de gripa, quand a Wuhan, una vila d’onze milions d’abitants, comencèron d’arribar dins los espitals divèrsas personas afectadas per un procès de pneumonia. Se detectèt que totes trabalhavan o vesitavan sovent lo mercat de Wuhan de carn e cauquilhum.
 
Ara per ara, se sap pas quina es l’origina de l’infeccion, mas qualques cercaires creson que poiriá venir d’animals infectats, coma se passèt amb la SRAS e lo MERS-CoV . Un estudi suggerís que lo poirián portar d’animals coma las genetas e los gals, mas aquò es pas encara confirmat.
 
 
Quin es son gra de mortalitat?
 
Segon las donadas inicialas, lo novèl coronavirus tua l’1,5% de las gents contaminadas, mas ne cal estudiar l’evolucion jornadièra. Per ara, l’2019-nCoV se pòt considerar mens agressiu dins sas consequéncias, en comparason amb la SRAS e lo MERS-CoV. Lo darrièr cas de la SRAS se raportèt fa mai de 15 ans e provoquèt la mòrt d’environ 800 personas e mai ne foguèsson infectadas aperaquí 8000, çò es un taus de mortalitat d’un 10%. Lo MERS-CoV es totjorn actiu mas es contengut dins la peninsula d’Arabia e a infectat près de 2500 personas en ne tuant environ 850, çò es una mortalitat d’un 35%.