capçalera campanha

Actualitats

InternacionalPoliticaSocietat

Sièis presonièrs politics catalans an comparegut al Parlament de Catalonha

Pendent qualques oras, los elegits encarcerats que fasián partida del govèrn de Puigdemont respondèron a las questions d’una comission que fa una enquista suls damatges de l’aplicacion de l’article 155

Sièis dels presonièrs politics catalans compareguèron ièr al Parlament de Catalonha dins una comission que fa una enquèsta sus l’aplicacion de l’article 155 de la Constitucion espanhòla, que permetèt al govèrn espanhòl de prene lo contraròtle del govèrn de Catalonha pendent uèch meses. Los deputats vòlon saber l’impacte negatiu sul budget social del país que se calcula d’una pèrda d’1,8 miliard d’èuros.
 
Atal, los presonièrs politics que fasián partida del govèrn de la Generalitat en octòbre de 2017 compareguèron ièr dins una sala del Parlament. S’agis del vicepresident Oriol Junqueras e dels conselhièrs Jordi Turull, Joaquim Forn, Raül Romeva, Jordi Rull e Dolors Bassa. Los presonièrs intervenguèron e respondèron a las questions dels deputats un après l’autre, mentre que los que parlavan pas èran susvelhats dins la sala d’audiéncias del Parlament.
 
Los deputats del Partit Socialista i participèron pas e los del partit espanholista Ciutadans quitèron la sala après far lors repròchis a Oriol Junqueras sens lo gausar quitament agachar dins los uèlhs. “Ara qu’enfin començam de dialogar partissètz?”, lor demandèt Junqueras, que precisèt: “Ieu ai pas jamai comandat de tabasar los votants ni mai d’encarcerar degun. Vaquí l’enòrma diferéncia entre ieu e mos collègas e los qu’aplaudisson a nòstra encarceracion. E la la pròva n’es que son pas demorats per escotar ma responsa”. En mai d’aquò, Junqueras defendèt l’estrategia de son partit de cercar totjorn lo dialòg amb l’estat espanhòl.
 
Quant a Turull, el remembrèt que l’aplicacion del 155 es la cima de “la messorga de la transicion” del franquisme devèrs la democracia, car aviá permés “l’intervencion dins las finanças de la Generalitat e l’intervencion dins las urnas”. Tanben aguèt de mots durs contra los deputats de Ciutadans en los convidant a tornar per escotar. “M’es de grèu que Ciutadans sián partits. Son maleducats e coards. En preson i a fòrça mai de dignitat”, çò diguèt.
 
De son costat, Raül Romeva precisèt que l’article 155 de la Constitucion espanhòla mençona pas la capacitat de destituir de govèrns ni mai de los encarcerar. Dins aquel sens, assegurèt que l’estat espanhòl aviá mal interpretat de la Constitucion. “Es pas un afar de leis mas d’un estat coard”, çò diguèt.

Josep Rull expliquèt que l’aplicacion del 155 los aviá empachats de se defendre de las messorgas que los avián condemnats a la preson, e precisèt que la senténcia contra eles marcava lo començament de la persecucion de totes los que “gausarián divergir”.
 
Quant a Dolors Bassa,  confirmèt que “lo 155 aviá sonque servit per arrestar las politicas socialas e economicas [...] e la creacion de luòcs d’aculhença per joves migrants e las politicas d’egalitat”.
 
Foguèt Joaquim Forn que detalhèt los blocatges de l’aplicacion del 155 e los projèctes politics e socials entamentats que s’arrestèron, en confirmant la chifra d’1,8 miliard  d’èuros blocats, çò es de foncionaris licenciats, d’escòlas barradas, de subvencions canceladas e d’ajudas socialas levadas, demest fòrças autras consequéncias.
 
 
“Unitat après un jorn trist”
 
Dins son intervencion, Forn demandèt l’unitat “après un jorn trist”. Forn parlava de la sesilha parlamentària de diluns passat, ont se manifestèt una manca d’acòrdi estrategic entre los tres partits independentistas amb de consequéncias malseguras.
 
Tot arribèt al moment que lo burèu del Parlament, comandat per Roger Torrent, d’ÈRC, decidiguèt de retirar lo drech de vòte del president de la Generalitat en foncions, Quim Torra, en seguissent l’òrdre de la Comission Electorala espanhòla que decidiguèt de lo far venir inelegible.
 
 

 

 



 

 
 
 
 
 
abonar los amics de Jornalet
 
 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

francesc palma
1.

A estat una gran alegria veire los presoniers politics catalans al Parlament parlant liurament puei dos ans de cautiveri. Esperi que las negociacions trobaran una solucion per posar los en libertat qu' es lo que las Nacions Unidas e los Drets Umans an dit repetidament.

  • 3
  • 0

Escriu un comentari sus aqueste article