Las fòrtas pluèjas que patís dempuèi dijòus passat lo centre de Brasil an causat mai de 40 mòrts, e un vintenat de desapareguts. Los imatges vidèo que nos arriban son esfraioses. Una de las vilas mai afectadas es Belo Horizonte, capitala de l’estat de Minas Gerais. S’agís del segond estat pus poblat de Brasil e se situa entre Brasília e la region de Rio de Janeiro.
 
D’efièch, Belo Horizonte a patit la pluèja pus intensa dels darrièrs 110 ans amb 171 litres per mètre cairat en solament 24 oras. Lo govèrn de Minas Gerais a declarat l’estat d’urgéncia dins un centenat de vilas e lo govèrn federal investirà 21 milions de dolars per ajudar a reparar los damatges.
 
Lo tempèri a fach tanben de mal dins l’estat vesin d’Espírito Santo, sus la còsta, amb aperaquí un desenat de mòrts.
 
Plusors mòrts, e de personas portadas desaparegudas, èran dins lors ostals que se son enfonzats o reversats pels avalancaments.
 
Almens 14 000 personas an degut abandonar lors ostals perque vivián dins d’airals inondables o amb risc d’avalancaments.
 
<iframe width="560" height="315" src="https://www.youtube.com/embed/wPFLX5SEWVA" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>