La polícia índia a mes en examen pels delictes d’òdi, sedicion e provocacion lo director d’una escòla de primària a Bidar (dins l’estat de Karnataka) per una pèça de teatre infantila critica envèrs lo primièr ministre Narendra Modi e la nòva e polemica lei del ciutadanatge. La polícia a interrogat d’escolans de nòu e dètz ans qu’an fach los actors dins aquela pèça, e mai ajan pas dobèrt cap de procès penal contra eles, çò rapòrta The Guardian.“La polícia a vesitat cada jorn l’escòla los darrièrs tres jorns e a interrogat d’enfants e de professors”, çò a explicat lo cap d’estudis de l’escòla, Yusuf Ahamed. “Nos tractan coma d'antiindians”, çò a apondut.
 
La nòva lei de ciutadanatge indian a congreat una polemica perque es acusada de discriminar los musulmans e d’afeblir las basas secularas de la Constitucion, car ofrís una via accelerada per accedir al ciutadanatge per totas las religions a l’excepcion de l’islam. Se crenh que los dos cents milions d’indians musulmans ajan d’aportar una documentacion que pròve lor nacionalitat indiana per pas èsser detenguts o fòrabandits.
 
Fa gaire, a fach lo torn d’Internet un enregistrament de la pèça de teatre escolara que mostrava d’escolans a discutir sus las incertituds dels musulmans a causa de la nòva lei del ciutadanatge e a cantar una cançon de Bollywood qu’es venguda un imne de protèsta. Aquò a compelit un membre del partit de govèrn Bharatiya Janata (BJP) aja a far una denóncia oficiala. Lo cap de la polícia de Bidal a confirmat qu’avián començat l’enquista per una denóncia que ditz que la pèça de teatre criticava e mancava al respècte degut al primièr ministre.
 
Es pas lo primièr còp que s’aplique lo delicte de sedicion, basat sul còde penal de l’epòca coloniala, a las protèstas contra la nòva lei del ciutadanatge, en las qualificant “d’antinacionalistas”. De desenats de femnas de l’estat d’Uttar Pradesh foguèron enseguidas per sedicion per aver fach un acamp pacific contra la lei.