Una còla de scientifics de l’Institut Peter Doherty de las Infeccions e de l’Immunitat, a Melbourne, en Austràlia, poguèt isolar, fin finala, lo nòu coronavirus 2019-nCoV extrach d’un pacient. Lo virus arribèt a l’Institut Doherty lo 24 de genièr passat e foguèt isolat abans la fin de genièr passat.
 
“Es un pas de gigant, çò diguèt Julian Druce, cercaire d’aqueste institut, pr’amor qu’ajudarà plan a la recèrca al diagnostic del virus 2019-nCoV al nivèl mondial. De scientifics chineses avián ja sequenciat geneticament lo nòu coronavirus, mas poder aver una mòstra reala del virus entraïna de poder dirigir lo metòde per sonhar aquesta malautiá e la poder encara melhor diagnosticar”.
 
Aital, segon Druce, lo virus serà utilizat e estudiat dins mai d’un laboratòri de santat australian e puèi enviat a l’Organizacion Mondiala de la Santat en Euròpa. Se farà servir nòu virus isolat per generar e far d’assages per ne trapar un vaccin, mas a l’ora d’ara serà ja fòrça util per trobar quals pacients sens simptòmas envara vesidors pòrtan la malautiá e la pòdon transmetre sens o saber.
 
“Amb l’isolament del nòu coronavirus, çò diguèt Mike Catton, director d’aquel institut de santat australian, ara se pòt dire que l’imatge del virus es melhor e aquò ajudarà plan a ne conéisser lo vertadièr taus de mortalitat. A mai, es decisiu de lo poder isolar per èsser capable de desvolopar lèu un vaccin”.
 
 
Un virus que contunha son espandiment
 
Aquesta bona notícia arriba del temps que la malautiá contunha son espandiment al nivèl global. Al començament de la setmana dechifras oficialas confirmavan que ja i avián pus de 500 personas mòrtas del coronavirus 2019-nCoV e que pus de 28 000 personas (dont mai de 100 en defòra de China ) èran ja malautas, dont la majoritat sens simptòmas – çò que fa venir pus grèu aquel virus pr’amor qu’una persona pòt aver lo virus e lo transmetre sens jamai desvolopar de simptòmas.
 
Al nivèl internacional, lo nòu coronavirus s’es espandit a l’ora d’ara dins mai de 25 païses dont los Estats Units, Russia, Alemanha, Espanha e tanben Occitània. Durant un solet jorn i aguèt mai d’un 30% de nòus cases en China e de vilas coma Hong Kong demandèron de barrar la frontièra per arrestar son rapid espandiment, çò que, fin finala, se produguèt.
 
Lo perilh, çò avisan d’analistas internacionals, es que lo virus pòsca aténher de païses qu’an pas un sistèma de santat de naut nivèl, coma lo chinés. Per ansin, l’arribada del nòu coronavirus dins de païses coma las Filipinas, Malàisia, Índia o divèrses païses africans poiriá èsser terribla perque, segon l’Organizacion Mondiala de la Santat, “s’i aguèsse mai d’un fogal d’aquesta malautiá en de luòcs desparièrs de la planeta, poiriá venir una grèva pandemia mondiala”. (Legissètz la seguida)



 

---

Aqueste article es  publicat dins Sapiéncia, la revista occitana de divulgacion scientifica, amb la quala Jornalet a un acòrdi de cooperacion. Podètz legir l'article entièr aicí.