Publicàvem dimenge passat l’anóncia d’un casting per encarnar Marcèu Panhòl al cinèma que faguèt polemica perque se cercava un enfant d’11 o 12 ans “sens accent”. Ara, totun, l’Assemblada Occitana a entamenat un dialòg positiu que s’es installat amb la còla del filme.
 
Revoltada per çò qu’interpretava coma una novèla manifestacion de mesprètz contra la lenga e la cultura occitanas, l’Assemblada Occitana a contactat la còla del filme. Dins sa letra de protèsta, la còla occitanista deplorava “l’ignorància e lo mesprètz exprimits dins l’anonci pertocant l’accent” e recordava que “l’accent dich «dau Sud» s’apèla l’accent occitan, e que Marcèu Panhòl parlava amb l’accent occitan e mai parlava l’occitan”. Enfin, s’interrogava sus la motivacion que s’escondiá “darrier la volontat de representar lei personatges principaus sensa accent e lei segonds ròtles amb l’accent occitan”.
 
Tanlèu, la directritz del casting, Sílvia Brocheré, respondèt a la còla de l’Assemblada Occitana amb un discors sincèr, çò rapòrta la quita assemblada.
 
D’un caire, la còla del filme assegura qu’a pas “la mendre d’intencion de desvalorizar l’accent occitan, ni de se trufar de la cultura provençala, ni de nafrar degun”. A mai, an reconegut que “la redaccion de l’anonci èra maubiaissuda e que se podiá mau interpretar. E ara vòlon corregir aquela redaccion per i levar lei malentenduts”.
 
A ne jutjar per las explicas, la demanda d’accents diferents, dins lo casting, correspond al besonh d’apariar los actors enfants amb certans actors adultes que son pressentits per jogar los ròtles dels parents. En mai d’aquò, reconeisson una dificultat tecnica per trobar d’enfants actors amb l’accent occitan, ja qu’aquel accent es de mai en mai rar. Tanben es malaisit de trobar d’actors que parlen amb aquel accent occitan amb una intensitat similara.