Motorola, qu’es ara la filiala en telefonia mobila de Google, va redusir fòrtament los efectius dins lo Mond, e poiriá barrar son sit a Tolosa, ont a 170 salariats. Lo barrament se poiriá passar la prima que ven.

Motorola Mobility, filiala de telefòns mobils del gigant american Google, poiriá barrar son sit de Tolosa ont trabalhan 170 personas, segon çò qu’anoncièt diluns passat la direccion de Motorola Mobility França. Alavetz, lo personal tolosan seriá victima del projècte de Google de suprimir qualques milièrs de pòstes de trabalh dins lo Mond.
 
La direccion e de representantas del personal tolosan comencèron la setmana passada las discussions sus “un eventual projècte de barradura”, çò declarèt un pòrtavotz de la direccion a l’AFP, “mas res es pas estat decidit”, çò apondèt. De son costat, La Dépêche du Midi parlava de la barradura del luòc coma d’una question entenduda e quitament n’evocava lo barrament per la prima que ven. Ça que la, cap de mèdia a pas pogut contactar Motorola Tolosa perque l’usina es barrada per las fèstas de Calendas. Las discussions entre partenaris socials recomençaràn en genièr.
 
Lo sit tolosan de Motorola es especializat en recèrca e desvolopament en matèria de telefonia mobila e de tauletas.
 
En agost, Google anoncièt la supression de 20% dels efectius de Motorola Mobility, es a dire, 4000 pòstes de trabalh, sens donar cap de reparticion geografica mas en assegurant que las plaças tangudas se trobarián als Estats Units. Lo gigant estatsunidenc ven d’anonciar tanplan la revenda del sector de descodificadors e modèms al grop Arris, e mai a arrestat la majoritat de sas activitats en Corèa del Sud en tot transferir los sits de produccion en China.
 
Al començament d’octòbre, Google, anoncièt que poiriá endurir encara mai la restructuracion de Motorola Mobility e suprimir mai de pòstes de trabalh que los anonciats en agost.
 
Motorola es installada a Tolosa dempuèi la fin dels ans 1960. En 2004 barrèt la division de circuits integrats electronics per l’automobila, cedida a Freescale, çò que portèt lo licenciament de 397 salariats, mas a mantengut fins ara lo sit tolosan dins l’activitat de recèrca e desvolopament en tot emplegar aperaquí 500 personas.
 
Lo barrament de Motorola a Tolosa perseguirà la seguida dels desengatjaments industrials estatsunidencs en Occitània. Après aquel de Molex, que licencièt 283 salariats a Tolosa, Texas Instruments va suprimir 517 pòstes de trabalh sus 609 a  Vilanòva Lobet (Vencenc), floron de l’economia locala dempuèi cinquanta ans.