La majoritat dels vilatges occitans son gaireben desèrts, victimas de l’exòde rural e de l’envielhiment de lor populacion, e la majoritat an vist a barrar totas lors botigas. Lo vilatge peiregòrd de Sent Peir de Frègia (Nontronés) a entamenat una iniciativa per que lo vilatge reprenga de vida, e i son arribats gràcias a l’ecologisme. O rapelava en 2016 Positivr e es totjorn un fach.
 
Après lo barrament del darrièr comèrci, lo bistròt que preparava los repaisses de la cantina escolara, lo cònsol màger de Sent Peir de Frègia, Gilbert Chabaud, se metèt al trabalh amb son conselh municipal per i tornar de vida. Dins un primièr temps, son conselh municipal votèt la fin de l’usatge dels pesticidas e dels tractaments fitosanitaris, çò que provoquèt lo retorn dels parpalhòls e d’autres insèctes pollinizaires qu’an fach reviure lo bòsc.
 
En seguida, la municipalitat decidiguèt de crear un “jardin partejat”, es a dire un òrt collectiu dobèrt a totes los abitants qu’i an plantat de frucha e legums. L’animacion solidària que l’a congreada l’iniciativa a despassat totas las previsions e l’idèa s’es facha conéisser endacòm mai.
 
Un còp l’environament melhorat, la comuna a crompat las zònas umidas de l’entorn per i far d’ecotorisme. An establit de novèlas draias de passejada e an restaurat lo patrimòni del vilatge. Aquò a fach venir tantes toristas qu’an quitament bastit un jaç rural e ecologic destinat a aculhir los vesitaires.
 
Lo bistròt es dobèrt tornarmai. E l’escòla tanben. E mai l’educacion nacionala o aja pas volgut far, an installat una escòla Montessori e tre sa primièra annada lo centre aculhissiá ja 20 escolans. Es benlèu lo moment d’i prepausar una Calandreta?