Era 10u edicion deth Festivau Rescontre de vidèo e cinèma qu’aumplic completament era sala dera mediatèca de Margarida (Costièra de Nimes). Era clau deth succès der eveniment qu’ei era grana implicacion des participaires e des sues proposicions. Ua dotzena de creadors de longa experiéncia (de mestièr o de vida) an estat protagonistes. A diferéncia des convencionaus taules d’expèrts, o des presentacions institucionaus, er eveniment qu’a artenhut de crear ena mediatèca de Margarida ua sòrta de petit mercat a on toti an quauquarren a véner, a on toti se presenten e a on toti an quauquarren a díder. Aquera vivacitat a bastit ua sociabilitat pòc comuna, a on era vergonha s’eradique e lèu-lèu s’arremèrque qui parle era lengua e qui n’ei simpatizant.
 
Entà èster sincèr, voleria nuançar que s’agís d’ua mòstra amatora e non pas d’un hestivau academic de cinèma. Es programaires que son indulgents damb era qualitat des filmets, hèt que jògue en favor d’aqueth engatjament popular que mencionam.
 
Maugrat era multidisciplinaritat deth cinèma, i a tostemp un element malaisit d’englobar e de valorizar en setau art: es accions. Eth cinèma pòt protegir-mos enes nòstes iniciatiues ciutadanes. Eth filmet ei un sosproducte, mès era accion ei plea de sens: sigue d’arreportar es manifestacions der 11 de seteme en Barcelona coma viatgèr-explorador representant dera sensibilitat occitana, sigue de promòir tot un projècte d’ensenhament en favor dera lengua. Coma en ua wiquimaraton, cau encoratjar d’aumplir Internet d’occitan. Partejar en Youtube es cançons que mos inspiren e qu’òm a desbrembat, ajudar as auti a dar as sues tradicions un format audiovisuau apropriat tath hilat (mès que mès en Internet estatic per dessús des murs sociaus, passatgèrs). Es estruments qu’emplegam e eth nòm que i dam pòc impòrte mentre mos botgem. Qui se botge be mòstre qu’ei encara viu.
 
 
 
 
Zep Armentano