L’epidemia del coronavirus s’espandís en China del temps que paralisa l’economia del país e mai de la planeta. Segon lo darrièr bilanç, i auriá mai de 1000 personas mòrtas e aperaquí 40 000 infectadas.
 
Las usinas chinesas que se son arrestadas a causa de l’epidemia començan d’influir sus l’economia mondiala. Atal, las societats japonesa Nissan e las coreanas Hyundai e Kia Motors an cessat lor activitat per manca de pèças que se fabrican normalament en China. De son caire, Suzuki es a cercar d’obténer sas pèças endacòm mai. D’autras societats automobilas coma Daimler, Ford o Tesla an perlongat lor periòde de vacanças e espèran de poder tornar a la produccion.
 
Practicament un mes e mièg après que lo mètge de Wuhan, Li Wenliang, ara defuntat a 36 ans, avertiguèt del coronavirus e que las autoritats lo faguèron calar, lo president Xi Jinping s’es enfin mostrat en public en tot vesitar una comunautat del nòrd de Pequin. A dich que la situacion es totjorn grèva mas a assegurat que China vencerà lo coronavirus.