Grècia reclama al Reialme Unit dempuèi longtemps las esculturas de marbre del Partenon de l’Acropòli d’Atenas, fachas fa mai de 2500 ans. Òr, après lo Brexit, l’afar es intrat dins la lista d’exigéncias europèas de las discussions sus las futuras relacions entre l’UE e lo Reialme Unit que començaràn aqueste mes de març. Dins la version mai recenta d’aquesta lista es comprés “lo retorn e la restitucion d’objèctes culturals illegalament retirats dins sos païses d’origina”, a la demanda d’Atenas amb lo sosten d’Itàlia. La frasa fa referéncia als coneguts Marbres d’Elgin expausats dins lo Musèu Britanic a Londres.
 
Segon lo pòrtavotz del govèrn grèc, Stelios Petsas, “la demanda de Grècia del retorn dels marbres del Partenon se manten ferma e es pas restacada a l’acòrdi del Brexit“, çò rapòrta Reuters.“Contunharem d'exigir lor restitucion”, çò apondèt en precisant que se servirián de las negociacions entre Londres e Brussèlas.
 
Lo Musèu Britanic de Londres a totjorn refusat de tornar las esculturas. Las emportèt d’Atenas al sègle XIX l’ambaissador britanic a Istambol, Lord Elgin, quand Grècia èra dins l’Empèri Otoman.