Lo comitat electoral suprèm d’Egipte anoncièt dimars passat, jorn de Nadal, que la nòva constitucion del país s’èra aprovada amb 63,8% de vòtes afirmatius al referendum constitucional debanat lo 15 e lo 22 de decembre. Aquela donada confirma çò qu’avián ja anonciat los Fraires Musulmans, lo movement islamista qu’es partisan del tèxt constitucional e que sosten lo president Muhammad Mursi. La participacion es estada de 32,9%, segon de donadas oficialas.
 
Lo comitat electoral diguèt tanben que totas las denóncias dels opausants sus la presumida fraudariá se son examinadas “en prigondor”.
 
Cossí que siá, la polemica es dobèrta perque l’oposicion manten la denóncia de fraudariá dins las eleccions e questiona la legitimitat de la consulta dins un país de mai en mai dividit.
 
D’efièch, la nòva constitucion a dividit Egipte entre los sectors islamistas, los laïcs e los crestians, qu’an paur de l’islamizacion del país e que veson menaçadas las libertats. Considèran que la constitucion entraïnarà una islamizacion de la vida publica e una reduccion de las libertats individualas, mai que mai de las femnas.
 
La division es arribada quitament al govèrn. Al delà del vicepresident Makki, sèt dels dètz e sèt pus grands conselhièrs del president Muhammad Mursi an demissionat aquestas darrièras setmanas.