Eth Ostau Comengés que demòstra dempús bèra estona qu’era nòsta cultura, occitana e pirenenca, ja ei un eretatge culturau plan larg que va plan mès enlà qu’era musica o era dança soletas. Qu’ei era lenga occitana e tot eth aubiatge culturau estacat ath nòste país, après millenaris d’evolucion que hèn era unitat e era gran riquessa dera cultura que portam!
 
En aquera tralha, eth dissabte 7 de març, a Sent Blancat, damb era passejada “Eths camins de Sent Joan deras Vinhas”, que seram peths costalats ath torn dera capèra romanica deth madeish nom e que vos i parleram deras hèstas de huec deths Pirenèus (classats eth Patrimòni Culturau Immateriau dera Umanitat pera UNÈSCO) mès tanben de toponimia, de tradicions, d’arquitectura e de pintura romanica, d’arqueologia, e de plan d ‘autas causas encara!
 
Eth madeish dia, a Montrejau, eths mès coratjoses ja poiràn usà’s eras cauçaduras en tot arrelevar era jòga dera Hlama Occitana. Aquera corsa de cinc o de quinze km qu’ei dempús 16 ans ua bèra ocasion d’aligar espòrt e defensa dera identitat occitana.
 
Aqueth eretatge, viu e preciós, que s’a de transméter aths mainatges. Qu’ei pr’amor d’aquò qu’era jornada deths gafets, eth divendres 3 d’abriu, e permeterà a 400 escolans, collegians e liceans qu’aprenguen eth occitan, de víver ua jornada amassa e tota en occitan. Ath programa que i aurà teatre, cant, bal, inicacion aras quilhas e entà acabar, un concèrt de Mena Bruch!
 
Eth endeman, tota era jornada, qu’auratz era causida entre cinc estagis entà descobrir o apregondir un element dera cultura occitana. Que n’i aurà entà totes: violon tradicionau, danças de Carcin, clarin, cançons de hemnas, e, ua nautat, adornament dera husta! Pendent tot eth hestau, que poiratz tanben véder era exposicion «Daunas en paraulas», sus eras hemnas pirenencas, que balherà ua color encara femenina ad aquera 17u edicion!
 
A partir de 18h00, ja començarà era grana hèsta, damb un programa a huec de calhaus: bal tot en variacion e en improvisacion, damb Mickaël Vidal; cantada e arrepèish deths productors; après sopar, eth concèrt de Mena Bruch; après, que torneram dançar sus eras influéncias latinoamericanas deth quatuor lengadocian Camille en bal e que claveram era net damb danças deths Pirenèus Centraus peth duo Bourry-Rouch!
 
Coma tostemps, aqueth hestau que serà un gran moment d’escambi, de hèsta e de convivialitat, a on ètz totes eths planvenguts, que vivatz aquera cultura deth cap dinca aths pès o que la volhatz tastar peth prumèr còp!
 
Tot eth çò que vos cau saber per: www.ostaucomenges.org.
 
 
 
 
Matiu Fauré