Chepic màger en Itàlia après la mòrt d’una persona en Venèt e d'autras tres en Lombardia a causa del coronavirus. Se calcula que i auriá mai de 130 personas infectadas, dont un piemontés de 40 ans que se tròba dins l’espital Amadieu de Savòia de Turin. S'es anullat lo carnaval de Venècia.
 
Per ensajar de prevenir la difusion de la malautiá, las autoritats an confinat una quinzena de comunas, ont se n’es enebida l’intrada e la sortida. Lo primièr ministre, Guiseppe Conte, a dich après un conselh de ministres extraordinari, que tanben s’es suspendut totas las activitats publicas, l’escòla e los eveniments esportius o religioses. Per tant, aquesta dimenjada s’es supendut 42 partidas de fotbòl. “Evidentament, i aurà de contraròtles”, çò a avertit Conte en reclamant la collaboracion ciutadana per evitar de movements dins las zònas afectadas pel Covid-19, e en soslinhant que, se cal, agirà la polícia e mai l’armada.
 


Un taus de mortalitat fòrça bas

De soslinhar qu’aqueste nòu virus que se’n parla tant dins los mèdias es fòrça contagiós, mas que son taus de mortalitat es fòrça bas e l’80% dels cases son leugièrs. Segon l’Organizacion Mondiala de la Santat (OMS), lo 13,8% de las infeccions son classadas coma grèvas e solament lo 4,7% son criticas.
 
Ça que la, l’OMS mòstra son inquietud sus l’aparicion de mai de cases en defòra de China e a recordat lo besonh d’investir mai d’esfòrces, sustot economics, per evitar d’arribar a una situacion de pandemia.
 
 
Cinquen mòrt en Euròpa
 
La mòrt d’aqueles quatre italians seguís la del torista chinés d’80 ans que moriguèt a París. De fach, França foguèt lo país mai afectat, çò que pertoquèt fòrça Occitània. Se’n confirmèt un cas a Bordèu e l’avion sortit de Wuhan amb de repatriats franceses transportèt una persona que presentava los simptòmas e que la menèron a l’espital marselhés de la Timona.
 
Ara Itàlia es l’estat de l’UE amb mai d’afectats d’aquela malautiá.
 

Italia canceló el Carnaval de Venecia por el temor al coronavirus https://t.co/6HMyREYtFD

— Infobae América (@infobaeamerica) February 23, 2020

 

Províncies ITA amb coronavirus. Hi ha grans àrees urbanes, com Milà, Venècia, Torí o Roma
Suspeses les activitats esportives d'aquest cap de setmana en diverses regions italianes.
Suspeses les classes durant una setmana a unes quantes províncies.
132 casos confirmats i 2 morts. pic.twitter.com/eGOYHJjbNL

— Josep (@JosepMClD) February 23, 2020

Chepic en Corèa e Iran
 
Tanben en Corèa del Sud i a un chepic màger après aver comptat 346 cases d’infeccion, dont la majoritat provenon d’una sècta crestiana nomenada Glèisa Shincheonji de Jèsus.
 
En Iran, se compta 18 infectats mas cinc mòrts. Aquel taus de mortalitat es pus naut que la mejana. A mai, lo fach que cap dels infectats aja pas agut de contacte amb l’origina chinesa de la malautiá inquieta lo govèrn. En mai d’aquò, la recenta tenguda d’eleccions fa crénher que la contagion se siá estenduda.
 
Per ara, Iraq a interdich l’intrada a totes los ciutadans iranians e accèpta sonque lo repatriament dels iraquians que passen cèrts contraròtles sanitaris.