Aperaquí mila membres de las primièras nacions de Canadà an marchat fins al parlament de l’estat, a Ottawa, jol lèma “idle no more” (pas mai de passivitat). Al delà, an blocat d’estradas e se son acampats davant d’institucions federalas per refusar la lei C-45, aprovada lo 21 de decembre passat.
Segon los indigènas, aquela nòva legislacion viòla lors dreches ancestrals, damatja l’environament e permet al govèrn de contrarotlar las zònas fins ara protegidas. Mai que mai permet l’exploracion e l’extraccion de petròli e de gas, e mai la pesca dins los rius de lors territòris.
Al delà, lo movement “idle no more” sosten la cauma de la fam que, dempuèi lo 15 de decembre, la manten Theresa Spencer, cap de la tribu attawapiskat, per fin d’exigir de responsas al govèrn del primièr ministre Stephen Harper, tocant los problèmas coma la pauretat, l’educacion e las infrastructuras per la populacion indigèna de Canadà, ja qu’afèctan mai que mai los attawapiskats del nòrd d’Ontàrio.
Spencer s’es installada dins un tipi sus una pichona illa del riu Ottawa, entre las províncias d’Ontàrio e Quebèc, e sonque s’alimenta amb d’aiga e de bolhon de peis.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
L'estatut del Ameridians canadians es totjorn lamentable. Nunavut foguèt un esfòrç dels bèls mas s'òm agacha las condicions de vida socio-economicas (esperança de vida, educacion, caumatge...), totes los indicators son al roge.
Sosten total a la lucha exemplara de las nacions autoctònas de l'America del Nòrd!
Que lo pòble occitan s'inspire de lor exemple!
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari