capçalera campanha

Actualitats

InternacionalPoliticaSocietat

Puigdemont a Perpinhan: “Preparem-nos perque avèm tot plen d’òbra de far”

Lo Conselh per la Republica reünifica Catalonha dins un eveniment independentista multitudinari qu’a multiplicat per dos la populacion de la capitala nòrd-catalana

| Jordi Borràs / El Món
“Preparem-nos perque avèm  tot pllen d’òbra de far”, çò diguèt ièr Carles Puigdemont a Perpinhan davant las 200 000 personas (110 000 segon la polícia francesa) que s’èran recampadas dins la capitala nòrd-catalana per tornar veire lo president de la Generalitat de Catalonha en exili. Tanlèu aquerir l’immunitat coma eurodeputat, Puigdemont a vesitat Catalonha acompanhat de sos èx-ministres en exili, tanben eurodeputats, Clara Ponsatí e Toni Comín. Mas a vesitat la Catalonha del Nòrd, car del costat administrat per l’estat espanhòl seriá mes dirèctament en preson. Dins aquel sens, Puigdemont revendiquèt Oriol Junqueras, cap d’ÈRC en preson foguèsse tanben elegit eurodeputat. Junqueras e los autres presonièrs politics mandèron un messatge àudio, del temps que Marta Rovira mandava, de Soïssa estant, un vidèo.
 
 
“Preparem-nos”
 
“La conquista de la libertat la cal far amb una granda preparacion. Preparem-nos fòrt perque avèm plan d’òbra de far e la podèm pas reportar. Nos cal èsser melhor coordenats, nos organizar sus tot lo territòri amb un ret que contraròtle efectivament lo territòri, nos cal èsser preparats contra la repression”, çò assolidèt. “Alestiguèrem un referendum e lo ganhèrem. Totas las victòrias futuras se pòdon solament aténher s’observam aquela paraula: ‘Preparem-nos’”.
 
Lo messatge de Puigdemont insistís sul besonh de persistir davant la repression de l’estat e de s’organizar per obténer “definitivament” l’independéncia”. Per Puigdemont cal pas esperar un moment melhor; “sèm ja dins lo moment”, çò assegurèt.
 
 
Comín: “Alavetz, los jutges bèlgas?”
 
De son costat, Toni Comín revendiquèt lo trabalh que pòdon far desenant coma eurodeputats per far veire a las institucions europèas que l’estat espanhòl manca als dreches civils e politics dels catalans.
 
En mai d’aquò, pausèt qualques questions al govèrn espanhòl: “Alavetz, los jutges bèlgas? Cossí anatz? Alavetz, los jutges alemands? Cossí vos sentissètz? E los escoceses? Alavetz, los jutges de la cort de Luxemborg? Alavetz los juristas del Grop de Detencions Arbitràrias de l’ÒNU? Alavetz, govèrn d’Espanha? Los escotaràs?”, çò demandèt del temps que la molonada disiá efusivament de “non!”. “Perque Espanha uèi es pas un estat de drech normal, es pas una democracia plena”, çò apondèt.
 
 
Ponsatí, contra lo dialòg amb Madrid
 
Foguèt Clara Ponsatí que parlèt pus clar. “Nos daissem pas enganar per de fotografias de taulas de dialòg que solament servisson per far ganhar de temps a Pedro Sánchez”, çò diguèt Ponsatí en referéncia al dialòg entamenat amb lo president espanhòl en seguida d’una negociacion amb ÈRC per poder èsser investit. “Tant que i aurà d’independentistas i aurà de repression, d’exili e de preson. S’es totjorn passat ansin.  Es doncas una engana d’opausar dialòg a independéncia. L’istòria de Catalonha se repetís pas per azard, se repetís perque sèm pas liures. Servís pas a res de reportar l’independéncia, servís pas a res de cercar nòstra plaça dins l’estat espanhòl. Aurem pas nòstra plaça tant que serem catalans”, çò assegurèt.
 
 
D’empediments sus la frontièra
 
E sembla que Ponsatí auriá rason, car aqueste dissabte, excepcionalament, la polícia espanhòla installèt un contraròtle après lo peatge de la Jonquera, en provocant de coas longassas de milièrs de veituras e de centenats d’autobuses. Aquò retardèt l’eveniment d’una ora. O anoncièt al public Lluís Llach de l’empont estant, en demandant amb umor de votar per referendum s'o acceptava.
 

Aculhit per l’USAP e per la comuna de Perpinhan
 
Puigdemont arribèt divendres en Catalonha après davalar d’un avion a Carcassona. Dins la capitala nòrd-catalana l’esperavan a l’estadi Aimé Giral ont Puigdemont foguèt aculhit e ovacionat. Après l’inaguracion d’una pèira portant lo nom de Puigdemont sus la paret que ten los noms dels personatges illustres pel club catalan de rugbi de XV, lo president catalan en exili vegèt lo match e se passegèt puèi sus la pelena mentre que sonavan divèrses imnes catalans, dont ElsSegadors.
 
Dissabte de matin, Puigdemont, e lo president en foncions Quim Torra, foguèron recebuts a la comuna pel cònsol màger de Perpinhan, Jean-Marc Pujol, e d’autres elegits e mai de candidats a las eleccions municipalas que venon.
 
Pujol reconeguèt l’exili dels elegits catalans e remembrèt lo qu’el aviá patit. “Sabi çò qu’es l’exili e çò qu’o viu Carles Puigdemont. Ieu meteis deguèri fugir Argeria en 1962”, çò diguèt.
 
 
Manuel Valls: “Perpinhan es pas Catalonha mas es França”
 
Malgrat la bona aculhença e totes los onors recebuts —e cap d’oposicion, ni mai del Recampament Nacional—, Manuel Valls, èx-primièr ministre de França e ara conselhièr municipal de Barcelona, diguèt sus Twitter en catalan, espanhòl e francés, que Puigdemont èra pas en Catalonha: “Sètz en França, una Republica, una e indivisible, sètz protegit per vòstra immunitat parlamentària mas i sètz pas benvengut. Vos liuratz a una provocacion contra Espanha, un estat de drech e una bèla democracia, e de valors de l’UE”.








 
 
 
 
 








 


 


abonar los amics de Jornalet

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris

Pitaluga
8.

#7 Mercé Francesc! Es normal d'èsser pas d'acòrdi sus tot. Sèm pas de macronistas per dire: se siás pas d’acòrdi amb ieu es que siás contra ieu. Lor daissam lor mond intolerant en blanc e negre. Ieu tanben, en general aprecii tos comentaris.

  • 2
  • 1
francesc palma
7.

Anaren a Perpinyà e es posaren a manjar "churros", feien una larga coa, portavan tots las banderas independentistas davant aquelha churreria. O mostraren per tv3 pel programa de Toni Soler "Està passant". Lo presentador se demadava: Però qu'està passant ! Si aguessin manjat una coca catalana de Montserrat, un pan amb oli amb tomàtiga, però non, churros. Se compren que non arribassen a temps a l'acte que començà a les 12 h. orari Europeu.
Pitaluga aquesta vegada non estam d'acord, però me solen agradar los teus comentaris e segur que seguiran agradant me.

  • 2
  • 3
Pitaluga
6.

#5 Pel moment se parla pas que de charrar, e sus taula i a pas res de la part de PS (Pedro Sànchez). Se parla de "diàleg" e se qualque còp es aparegut "negociar" es per la peta qu'an agut a Madrid amb l'acte de Perpinhan (veire las entrepachas derisòrias de la frontièra).
A! Solide! Demest los participants an pas compat los que poguèron pas passar e que, coma testimonièron d'unes qu'i anavan en autocarri, se deguèron contentar d'ausir los discorses a la ràdio, rambats a costat del valat, al Pertus.

  • 8
  • 2
francesc palma
5.

I què ? Què s'a conseguit, siular a la mesa de negociacions. Un mitin de Junts per Catalunya per guanhhar unas eleccions que no se sap quan se faran. Ponsati se lleva la careta e dits la consigna de Junt per Ca. ela a Waterloo e los presos encarcellats qu' es fotin, qu' aguessen fait com ela fogir. Cola de sangoneras.

  • 4
  • 12
Pitaluga
4.

An fach tot çò qu'an pogut per o empachar.
Quitament emmerdar los qu'arribavan en veitura al Pertus.
I son pas arribat.
Lor demòra pas mai que d'escupir sus l'eveniment en lo minorizant.
I pas gaire, un trentenat de personas, per sabi pas quina motivacion colhona, foguèron presentats coma una manifestacion. I a pas res a dire: los franceses son plan informats.

  • 11
  • 2

Escriu un comentari sus aqueste article