Aquí lo mes de març que comença. A la mitat del mes, tornarem trapar las confrontacions del campionat NRL en Austràlia, mas ara per ara, demorem concentrats sus Euròpa, Catalonha e Occitània.

Los Dragons refusan de plegar
 
En Superliga, los Dragons èran en desplaçament del costat d’Hull FC; lo primièr temps foguèt equilibrat, fins a la darrièra minuta ont los catalans, coma tròp sovent, encaissèron un ensag: 16-10 pels locals. Las causas se melhorèron pas a la represa e la marca passèt a 28-10 en favor dels angleses. Los catalans contunhèron d’atacar e, amb 3 ensages (Jullien, Drinkwater, Langi) transformats per Maloney, tornèron a nautor d’Hull FC. A doas minutas de la fin, un tombat balhava l’avantatge als Aucèls de Mar. Mas Folau recuperava la palma sul còp de pè de relança: al cap de l’accion lo dobertura Maloney marcava l’ensag e ajustava la transformacion que permetián als Sang e Aur d’arrancar la victòria: 34-29.
 
Dissabte, los Catalans tornaràn trapar Brutus amb la recepcion dels Diables Roges de Salford, batuts aqueste dimenge sus lor pelena per Wakefield: 22-12. Victòrias al defòra tanben per Castleford (28-8 cò d’Hull KR), e Wigan (42-10, co d’Huddersfield). Leeds domina Warrington 36-0 e Toronto contunha son aprendissatge de la competicion en encaissant un 32-0 fàcia a St Helens. Wigan e Castleford son en cap de classament.
 
 
E de quatre per Tolosa
 
En Championship, lo Tolosa Olimpic encadena una quatrena victòria del costat de Whitehaven: 40-4 abans de reçaupre los Dògols de Batley aqueste dissabte a Ernèst-Wallon (6 oras del vèspre). Per celebrar la jornada dels dreits de las femnas, beneficiaràn de l’entrada a gratis per aquela partida.
 
 
Elèit 1: mesa a jorn del calendièr
 
En Elèit 1, èra una dimenjada de recobrament, mas la partida Dragonets-Tolosa foguèt un còp de mai remandada. Albi coneguèt de dificultats per batre Palau que joguèt a 12 (en rason d’un carton roge) mai d’una ora: victòria 34-14 pels tarneses. Vilanòva demorèt mèstre sus sa pelena e bloquèt lo retorn tardiu de Lesinhan: 32-26.
 
Al programa de la dimenjada qu’arriba: un prometeire Lesinhan-Albi al Molin; Carcassona cercarà la victòria a Palau per demorar en corsa per la qualificacion; lo primadièr Limós se mesfisarà d’una esquipa de Vilanòva en forma. Avinhon-Dragonets deuriá èsser una partida equilibrada. Lo dèrbi de Nauta Garona St Gaudenç-Tolosa serà la cinquena partida d’aquesta dotzena jornada.
 
 
 
 
Alan Roch