L’Union Europèa a mostrat son sosten a Grècia per evitar una nòva crisi migratòria, malgrat las esglasiantas e polemicas decisions del govèrn grèc per arrestar l’intrada dels refugiats amb d’atacas de la polícia e de l’armada contra aquelas personas. Dins una compareissença entre Grècia e Turquia, los caps de las tres institucions europèas an donat lor plen sosten a Atenas en disent que lo país ellèn èra “lo bloquièr” de l’UE.
 
La presidenta de la Comission Europèa, Ursula Von der Leyen, acompanhada del primièr ministre grèc, Kyriakos Mitsotakis, avertiguèt Turquia e assegurèt son sosten a Grècia dins lo contraròtle de l’intrada dels migrants. Tanben lo president del Conselh d’Euròpa, Charles Michel, assegurèt que “la proteccion de las frontièras es cruciala per l’avenir de l’UE” del temps que lo president del Parlament Europèu, David Sassoli, insistiguèt que caliá una politica migratòria comuna.
 
Los dirigents europèus an reclamat a Turquia que complisca l’acòrdi migratòri signat en 2016 amb lo qual Turquia s’engatjava a conténer los refugiats que fugissián la guèrra de Siria. “Turquia es pas un enemic e las gents son pas de mejans per aténher una tòca”, çò diguèt Von der Leyen. De ramentar que divèndres moriguèron 33 soldats turcs durant una ataca dins la província d’Idlib, en Siria, e que la reaccion de Turquia foguèt de dobrir las frontièras e menar los refugiats sirians contenguts en Turquia devèrs sa frontièra amb Grècia per obligar l’UE de sosténer son intervencion militara en Siria.
 
En vesita en Grècia, los caps europèus an anonciat una ajuda de 700 milions d’èuros e de 100 policièrs per ajudar las autoritats grègas a sagelar lor frontièra amb Turquia.
 
De son costat, lo govèrn de Grècia acusa Turquia de se servir dels refugiats. Dins aquel sens, lo conservator Kyriakos Mitsotakis avertiquèt que Grècia èra lèsta per afrontar la situacion e “protegir sa sobeiranetat” en tot acusar Turquia d’èsser un “trafegaire oficial de migrants”, pel fach de “mandar” de personas en Grècia amb la tòca d’obténer quicòm en contrapartida.
 
 
Res sus l’acarniment grèc suls refugiats
 
Cap d’intervencion a pas evocat las accions polemicas de las polícia e armada grègas contra los migrants, ni res s’es dich.suls imatges dels còps de baston e dels assauts en batèu rapid ni mai sus l’enfant e lo jovent mòrts en ensajant d’arribar en Euròpa. Solament la pòrtavotz de l’executiu europèu, Dana Spinant, diguèt abans la conferéncia de premsa dels dirigents europèus que s’analisariá aquelas accions e se publicariá un rapòrt.
 
L’acarniment de Grècia suls refugiats qu’ensajan d’aténher l’UE a travèrs del país ellèn es terrible, coma o rapòrta lo jornalista Oriol Bäbler dins Vilaweb. Los vidèos que nos arriban mòstran d’accions injustificablas de la polícia e de l’armada, de vaissèls de la gàrdia costièra a tirar sus de barcas totas plenas de mond, d’ultradrechistas a tabasar de personas que fugisson una guèrra crusèla.