Novèla revirada de la Cort de Justícia de l’Union Europèa en Luxemborg contra la justícia espanhòla, ara a prepaus de l’afar Valtònyc: lo cantador malhorquin de rap, Josep Miquel Arenas, de nom d’artista Valtònyc, que se tròba en exili en Belgica.
 
Espanha aviá demandat l’extradicion automatica del rapaire per un delicte d’enaurament del terrorisme pr’amor de las paraulas d’una cançon contra lo rei emerit, Joan Carles Ir. Mas, segon la legislacion europèa, aquela mena d’extradicion es solament permesa per de crimes punits dins l’estat en question amb almens tres ans de preson. Valtònyc lo condemnèron a dos ans de preson segon la lei espanhòla de 2012, mas quand se depausèt lo mandat d’arrèst europèu, lo còde penal aviá aumentat la pena per aquel delicte après la reforma facha en 2015. En novembre passat, l’avocata generala de la cort luxemborgesa aviá ja avisat qu’Espanha ne podiá pas reclamar l’extradicion amb un còde penal posterior als faches.
 
Dimars passat, los jutges del tribunal luxemborgés considerèron que l’estat espanhòl podiá pas aplicar lo còde penal retroactivament per demandar l’extradicion automatica del cantador. Ara lo procès contra el es a l’espèra de la senténcia que prononciaràn los jutges bèlgas.
 
En 2018, la justícia bèlga aviá ja refusat l’extradicion del cantador. Segon lo tribunal de Gant, las acusacions espanhòlas de “menaças, enaurament del terrorisme e injúrias a la corona” èran pas cap de delicte ni en Espanha ni en Belgica. Lo ministèri public espanhòl faguèt un recors a la cort d’apelacion que foguèt rebutat.