L’Organizacion Mondiala de la Santat (OMS) anoncièt dimarts passat la garison de la darrièra persona afectada per Ebòla dins la Republica Democratica de Còngo, una femna que li dison Masiko Muhaso. Sens autres cases confirmats, dimarts comencèt lo compte de 42 jorns per declarar la fin de la segonda epidemia d’Ebòla pus mortala de la planeta. Mentretant, 46 personas son encara en observacion, de mond que foguèron en contacte amb Muhaso. A mai, demòran en vigor los protocòls de responsa a aquel virus per reagir lèu e eficaçament s’i aviá un eventual nòu cas. La fin de l’epidemia se poirà solament constatar quand seràn passats los 42 jorns de rigor dempuèi dimars passat, se i a pas cap de nòva infeccion.
 
Lo doctor Matshidiso Moeti, director de l’OMS en Africa, exprimiguèt sa gratitud per “los esfòrces infatigables que se son faches per respondre a aquela epidemia” e diguèt qu’èra “vertadièrament encoratjat” per la nòva. Tanben remembrèt que se podiá pas considerar la fin d’Ebòla al país e que caliá totjorn susvelhar.
 
Lo personal sanitari de Beni festegèron amb de musica e de danças la garison de Masiko Muhaso.
 

An emotional day in #Beni#DRC as Masiko, the last #Ebola patient in DRC leaves the Ebola treatment centre in #Beni! Our @WHO team was delighted to share this victory with Masiko, @MinSanteRDC, our partners, & the people of Beni. pic.twitter.com/2OQ1N14x1e

— WHO African Region (@WHOAFRO) March 3, 2020

 
L’epidemia actuala d’Ebòla se declarèt lo 1r d’agost de 2018 e es la desena que l’a patida la Republica Democratica de Còngo e la segonda pus mortifèra dempuèi l’epidemia de 2014 a 2016 en Africa occidentala.