Lo burèu del del Congrès dels deputats espanhòl a refusat doas demandas per crear una enquista sul rei emerit espanhòl Joan Carles Ir a prepaus dels sospechats comptes irregulars que ten en Soïssa e dins d’autres paradises fiscals en nom de tèrças personas, e tanben a refusat de ne determinar las consecutivas responsabilitats “civilas, eticas e politicas”. Mai d'un partit avián sollicitat una comission d’enquista après que La Tribune de Genève publiquèt que Joan Carles Ir aviá en 2008 cent milions de dolars sus un compte de Genèva, qu’èra un present del rei Adb Allah d’Arabia Saudita. Lo compte èra dins la banca Mirabaud e al nom de la Fondacion Lucum, una entitat panamenca que lo sol beneficiari n’es justament Joan Carles de Borbon.
 
Segon lo quotidian soís, lo rei espanhòl retirèt d’argent d’aquel compte pendent qualques annadas, fins qu’en 2012 una bona part de çò que ne demorava, environ 65 milions, foguèron remeses a Corinna zu Sayn-Wittgenstein, mestressa del monarca, que los depausèt dins la filiala d’una autra banca de Genèva dins las illas Bahamas. Aquelas transaccions, que fins ara èran pas publicas, son examinadas criminalament per las autoritats soïssas, que las considèran “suspèctas d’emblanquiment de cabals”.
 
Inviolable
 
Mas lo burèu de la cambra bassa espanhòla a refusat de constituir la comission d’enquista après que la Cort Constitucionala confirmèt que la figura del rei, segon la Constitucion, èra inviolabla. Atal o diguèt la pòrtavotz del PSÒE Adriana Lastra: “Cal simplament legir la Constitucion per saber que lo rei es inviolable”.