Owni apareguèt en 2009, èra un nòu mèdia numeric francés basat sus dos grands pilars: lo reportatge classic, d’un costat, e l’esplecha de l’incipient jornalisme de donadas, d’un autre costat. Tre aquel moment, s’èra fach la siá plaça dins lo dens panorama informatiu numeric, que pasmens li a pas permés de subreviure. Lo 21 de decembre, mentre que totes parlavan del cambiament d’estapa del calendièr maia, se metiá fin a una experiéncia jornalistica innovatritz e fresca.
 
Lo mes de mai passat, la societat 22 Mars qu’a gerit la publicacion aviá ja devesit las activitats del portal en doas societats autonòmas: aquela d’Owni, especializada en l’informacion, e aquela de Tactilize, de creacion d’aplicacions per tauletas.
 
Aquò foguèt pas pro e, après l’estiu, se prepausèt que lo portal venguèsse una agéncia de comunicacion. L’idèa agradèt pas a la redaccion e lo director, Guillaume Dasquié, demissionèt.
 
Dins un darrièr assag de reactivar lo portal, aqueste mes de decembre, Owni a fach una consulta en linha per saber se caliá far pagar los contenguts. Malgrat que mai de dos mila internautas e lectors respondèron, lo resultat es pas estat satisfasent e an optat per barrar las activitats. Mas lo portal se manten: “Totes los archius rèstan en linha. Es un ben comun de Creative Commons”.