Davant la situacion d’alèrta e la subreabondància d’informacions que las viu tota Occitània a causa de la Covid-19 causada pel darrièr coronavirus, publicam dins Jornalet qualques informacions que venèm de verificar amb de mètges e d’expèrts del departament de la santat de la Generalitat de Catalonha. Cresèm que seràn interessantas per tota la populacion.
Quina es la tòca de las mesuras d’urgéncia?
La tòca de la situacion actuala e dels conselhs de demorar a l’ostal es d’evitar de contagions massissas. D’ivèrn, las infeccions respiratòrias, coma las gripas comunas o los raumasses, son frequentas, e se vòl evitar que la Covid-19 faga partida d’aquelas infeccions pròprias de l’ivèrn.
Que sabèm d’aquel novèl virus?
Nos trobam davant un virus tan novèl que los scientifics son encara a enquistar sus son comportament. Es de bon saber que i a fòrça sabents de tota la planeta qu’i trabalhan. Lo nomenan SRAS-CoV-2 e la malautiá qu’el genèra, la Covid-19. Es mai leugièr qu’una gripa, mas se contamina fòrça lèu e pòt causar de problèmas grèus a las personas amb de problèmas d’asma, d’ipertension, de bassas defensas immunitàrias o d’edat avançada.
Quin es lo risc de tombar malaut?
Aquò depend de l’airal. Mas ara per ara sembla que lo risc de contagion en Occitània siá inferior al de la gripa comuna. I a cèrts airals ont lo risc es pus naut, a causa del nombre de cases, coma es lo cas de Quilhan, en Rasés. Cal far un pauc mai atencion e seguir las recomandacions de las autoritats sanitàrias.
En cas de contaminacion, la malautiá es leugièra
En cas de contaminacion, la malautiá ès fòrça leugièra. Los malauts senton un malèsser general acompanhat de fèbre e de tos. La majoritat de mond la passan a l’ostal e òm se garís tot sol dins un periòde d’aperaquí sièis jorns. Ça que la, las personas de las feblas defensas immunitàrias o amb de problèmas respiratòris an de besonh de suènhs medicals.
Es important d’èsser confinat?
Los mètges demandan a las personas que presenten de simptòmas leugièrs que demoren isoladas a l’ostal. Es pas res mai qu’una mesura de responsabilitat per evitar de contaminar los amics, los collègas e los vesins.
Tant qu’òm serà isolat a l’ostal es important de seguir las recomandacions dels mètges, del personal sonhant e de la familha que viu amb se.
D’autras mesuras de prene en compte
Per evitar de contaminacions, tant de la Covid-19 coma de tota autra malautiá infecciosa, es necite de se lavar las mans sovent. En cas de tos o d’esternut, se cal cobrir la boca e lo nas amb de mocadors de papièr o amb l’avantbraç e se lavar las mans sul pic.
Cal tanben evitar de partejar de manjar e d’aisinas sens que sián netejats coma cal.
Cal pas abusar de las mascas de proteccion
Es pas de besonh d’utilizar de mascas de proteccion dins los espacis publics. D’efièch, davant la manca de mascas, es completament insolidari de las emplegar s’un mètge o nos a pas recomandat. Las mascas de proteccion devon èsser reservadas al personal que trabalhan amb los malauts, e a certans malauts que los mètges las lor an recomandadas.
Quina es la portada mondiala de l’infeccion?
Sus la mapa que seguís podètz veire los cases d’infeccion a dicha que se confirman, sus tota la planeta.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#2
Me cal pas doblidar (es fach) de còps una brava cinsa d'òli essencial "Ravintsara" , o "albre a té" tres techas amb'un bocin de mèl cada matin.
A l’ostal, cal far comborir de fust de cetim o de fustim per tsemple de cedre.
Qu’una òlga bona e de bon nolre fasquessa fugir bruèissas e sarnègas de l’ostal e mantengue un aire sanitós al dintre.
fust de cetim = bois de santal
Fustim = bois odoriférant
Las mascas de proteccion que son hòrt utilas, au contra. Lo problèma qu'ei n'i a pas pro. Mès ne cau pas díser que las mascas ne son pas utilas, qu'ei propaganda governamentau, aquò !!!! N'an pas previst pro de mascas tà protegir la populacion, alavetz qu'explican las mascas que son inutilas. Com n'i a pas tròp de mascas, en l'estat actuau deus fèits, que los cau reservar aus qui son los mei expausats. Mès i agosse pro de mascas, que caleré que totòm, absoludament totòm, en portesse en lòcs publics, plan segur. E shens que los personaus de santat. Aquò que frenaré la propagacion deu virus,
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari