Lo president del govèrn espanhòl, Pedro Sánchez, s’es autoproclamat “autoritat unica” de l’estat espanhòl fàcia a la crisi del coronavirus. Atal o anoncièt dissabte dins una compareissença a la television après decretar l’estat d’alarma que comença aqueste diluns. Sánchez a recentralizat las competéncias regionalas de polícia e santat e a quitament mes solament de ministres de son partit al front del comitat de crisi en tot escartar sos sòcis de Podèm. Catalonha, País Valencian, las illas Balearas e lo Bascoat an protestat del temps que l’ultradrecha de Vox a saludat la decision de Sánchez per “aver mes a despart los comunistas e los separatistas”.
 
D’efièch, lo govèrn espanhòl a profechat de l’estat d’alarma per far una campanha patriotica en fasent publicar sus la primièra pagina dels jornals de dimenge una anóncia que ditz “aqueste virus l’arrestam units”.
 

Una mostra evident de quina és la prioritat de Pedro Sánchez. Una altra mostra lamentable del servilisme i la submissió al poder dels mitjans de paper. I una explicació gràfica, que alguns haurien d’entendre i assumir, d’on són els límits del règim. pic.twitter.com/oAYOvL4dKN

— Vicent Partal (@vpartal) March 15, 2020

 
Las mesuras
 
Las mesuras decretadas per Pedro Sánchez limitan la liura circulacion dels ciutadans dins l’estat espanhòl coma mesura per evitar l’expansion de l’epidemia. Lo mond poiràn circular individualament per carrièras per crompar de noiridura o d’autres produches de besonh, per se gandir als centres de santat, per anar e tornar del trabalh, per tornar a l’ostal, per assistir de parents dependents o andicapats. Son barrats tota sòrta d’establiments comercials franc dels burèus de premsa, de tabac, las estacions de benzina, l’alimentacion e, d’un biais mai estonant, los tenchurièrs e los perruquièrs.
 
En mai d’aquò Sánchez manten los servicis de transpòrt public, los trens, avions e camions, e mai aja anonciat que los avions e los transpòrts de mejana distància se reduiràn a la mitat.
 
Las escòlas, los bars e los restaurants son barrats.
 
 
Per la Generalitat de Catalonha es “irresponsable”
 
Lo president de la Generalitat de Catalonha en foncions, Quim Torra, a fòrça deplorat aquel estat d’alarma de Sánchez. Es “insufisent” e “irresponsable”, çò a dich. Torra planhiá dempuèi qualques jorns que los ciutadans de Madrid, un dels nuclèus mai grands de l’infeccion, poguèsson viatjar tranquillament per tot l’estat.
 
“Cal isolar Catalonha e isolar Madrid e totes los fogals de naut risc”, çò diguèt Torra ièr dimenge après una reünion per videoconferéncia amb Sánchez e los presidents dels diferents govèrns regionals de l’estat.
 
De fach, la Generalitat aviá decretat divendres lo confinament dels ciutadans dins lors ostals. “Voldriam que lo confinament total s’apliquèsse a tot l’estat espanhòl. Lo govèrn espanhòl deu pas permetre l’exòde de ciutadans de las zònas pus afectadas”.
 
Atal, après la presa de poder de Sánchez, Torra demandèt als ciutadans que de tot biais “s’autoconfinèsson” e que sortiguèsson solament per carrièras los trabalhadors de l’alimentacion, de l’assisténcia sanitària e dels servicis essencials. Sembla que la majoritat de la populacion en Catalonha seguís la demanda de Torra.


 
 
 
Desplegament de l’armada
 
Mentretant, lo govèrn espanhòl a ordenat lo desplegament d’unitats d’emergéncia de l’armada dins qualques vilas de l’estat. Dins aquel sens, lo Ministèri de la Defensa a remembrat que “dins lo quadre de l’estat d’alarma los militars pòdon donar d’òrdres als civils, que son obligats de las seguir se vòlon pas cometre un delicte de desobesissença o de resisténcia a l’autoritat”