Coma los autres espòrts, lo XIII se trapa confrontat a la question del coronavirus. La federacion francesa a decidit d’arrestar totas las competicions per ara. La Superliga a pas encara pres de decisions, mas ja qualques partidas se poguèron pas jogar.
Los Dragons pensavan de reçaupre Leeds, mas a pòrtas barradas. Levat qu'un jogaire anglés foguèt tocat pel virus e que los Rinocèros se desplacèron pas a Perpinhan. Alara que los autres espòrts (fotbòl, XV) se son arrestats en Anglatèrra, se vei pas cossí l’RFL e la Superliga contunharián.
Tres partidas en Superliga
Dijòus, la desfaita d’Hull FC sus sa pelena 4-38 fàcia a Warrington costèt sa plaça a l’entraïnaire local, Lee Radford. Divendres, Salford assegurèt dins lo segond temps sa victòria sus Wigan: 18-14. Dimenge, lo campion Saint Helens coneis una novèla desfaita a Castleford: 28-14.
Lo cinquen torn de la Cup permet a Toronto de signar sa primièra victòria de la sason 18-0 en eliminant Huddersfield. Hull KR elimina sus la còrna Leigh, formacion del Championship: 22-19. Newcastle (Liga 1) capita de se qualificar; Wakefield (victoriós de Bradford), Dewsbury (22-16 fàcia a Whitehaven) e Featherstone (46-6 fàcia a Hunslet), Sheffield (34-18 contra Warkington), York (70-12 contra Rochdale), Widnes (32-16 contra Swinton) se qualifican tanben pel torn seguent ont las autras 8 formacions de Superliga dintraràn en competicion. Serà pels 4 e 5 d’abril, se lo coronavirus o vòl plan!
E, efectivament, aqueste diluns de ser, la RFL e la Super-Liga an pres la decision de suspendre las competicions fins al 3 d’abril.
L’NRL lança son campionat
En Austràlia, la primièra jornada del campionat de l’NRL se dobriguèt dijòus per una victòria de Parramatta fàcia a Canterbury 8-2. Divendres, Canberra dominèt los Titans 24-6 e Brisbane anèt ganhar cò dels Vaquièrs 28-21. Dissabte, Newcastle passèt 20-0 als neozelandeses; Penrith dispausèt dels campions, los Poletons de Sydney: 20-14. La partida foguèt sarrada entre los Lapinons e las Làmias; victòria dels Lapinons: 22-18.
Dimenge, doas formacions s’impausèron al defòra: Melbourne cò de Manly: 18-4 e los Tigres de l’Oèst a Sant Jòrdi: 24-14.
La segonda jornada se jogarà a pòrtas barradas. Los NZ Warriors dintraràn puèi dins lor país, çò que lor impausarà un confinament de catòrze jorns e l’impossibilitat de reçaupre los australians o de quitar lo país!
Es atal que lo fuèlh dels resultats se transforma en bulletin medical!
Alan Roch
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Australia es lo païs que lo Primièr ministre incitava las gents a cantar de pregàrias per far tombar la pluèja e atudar los incendis.
Es tanben lo païs que las solas mesuras presas son per l'economia. Res per la santat -s'aquò a pas cambiat darrièrament que d'aqueste temps tot passa al brutle...
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari