Fa qualques jorns, saupèrem que lo rei emerit d’Espanha, Joan Carles de Borbon, aviá amagat 65 milions d’èuros dins un paradís fiscal. Segon La Tribune de Genève, èra d’argent irregular que proveniá d’un present del rei Adb Allah d’Arabia Saudita. Dissabte, lo jornal britanic The Telegraph raportèt que lo destinatari de tot aquel argent èra lo rei d’Espanha Felip VI.
 
Tre foguèt conegut l’escàndol, lo rei espanhòl reagiguèt sul pic. Dimenge, dins un comunicat, lo rei Felip VI diguèt que renonciava a aquel “eiretatge” e a “quin actiu que foguèsse, investiment o estructura financièra que son origina, sas caracteristicas o sa tòca foguèsse pas d’acòrdi amb los critèris de rectitud e integritat que regisson son activitat institucionala e privada”.
 
Amb aquela frasa Felip VI reconeguèt l’informacion revelada per The Telegraph, e que lo jonh dirèctament als afars de son paire, Joan Carles Ir. L’enquista del jornal anglés explica que Joan Carlos creèt la Fondacion Lucum en julhet de 2008. Aquela societat, que son sèti es en Panamà e que ten un compte dins la banca Mirabaud de Genèva, es ont lo rei d’Arabia Saudita, alara Abd Allah Ir, depausèt los 65 884 405 èuros coma pagament de servicis per la construccion d’una linha de TGV el país arabi.
 
Felipe VI ditz que coneguèt l’existéncia d’aquela fondacion en març de 2019 a travèrs d’un burèu d’avocats e qu’en abril compareguèt davant un notari per declarar qu’aviá mandat una letra a son paire per refusar aquel argent en cas qu’el ne foguèsse lo destinatari.
 
Segon lo quotidian britanic, los estatuts de la fondacion designan que lo primièr beneficiari es lo quite Joan Carles e que lo segond es Felip VI, que “deu entreténer, pendent sa vida, la rèsta de la familha reiala” e deu satisfar a “quina demanda rasonabla que siá” de sa maire, de sas sòrres e de sos enfants.
 
 
“Basta simplament de legir la Constitucion per saber que lo rei es inviolable”
 
Tanlèu que se saupèt qu'existissiá tot aquel argent irregular, qualques deputats demandèron dos còps que s'entamenèsse una enquista. Mas lo burèu del Congrès dels deputats espanhòl refusèt aquelas demandas e volguèt pas constituir una comission d’enquista après que la Cort Constitucionala aguèt confirmat que la figura del rei, segon la Constitucion, èra inviolabla. Atal o diguèt la pòrtavotz del PSÒE Adriana Lastra: “Basta simplament de legir la Constitucion per saber que lo rei es inviolable”.