L’Universitat Pau Valèri a Montpelhièr prepausa una licéncia LLCER (Lenga, Literatura, Civilizacion Estrangièra e Regionala) d’occitan amainatjada en un an mercé al SUFCO (Servici Universitari de la Formacion Continua). Contràriament a la licéncia en tres ans qu’ofrís la possibilitat d’un ensenhament a distància, aquel cursus se pòt far sonque en presencial. Lo finançament pòt èsser public amb Pòl Emplec o lo Conselh Regional, o ben privat pel biais d’una entrepresa, d’un OPCA (Organisme Partitari Collector Aprovat) o d’un OPACIF (Organisme Paritari per Comjat Individual de Formacion). Demòra un limit ça que la de tres inscripcions per annada escolara.
 
Los corses porgits fan veire lo programa de las tres annadas de licéncia. Aquò demanda doncas un trabalh de contunh que li fa mestièr un investiment bèl. Ieu que fau ongan los trajèctes quotidians, mai que mai en tren, m’avisi del ritme sostengut d’aquela formacion. Profièchi d’una longa dimenjada, del divendres al dimenge, per bufar un pauc e assegurar lo trabalh qu’es demandat a l’ostal. Alara solide que cal trapar la bona organizacion. Los ensenhaires son totjorn disponibles e implicats dins los progrèsses de cadun. Atal es una experiéncia tras que rica de poder cabussar d’a fons dins l’aventura occitana.
 
La varianta utilizada mai que mai es lo lengadocian. Pasmens trapi fòrça formatiu de poder ausir d’autras formas de parlars. De fach, cèrts estudiants o professors venon de parçans divèrses d’Occitània. Aquela diversitat dels escambis permet d’afortir de longa son repertòri pròpri, que siá lingüistic o cultural.
 
A l’ora d’ara, teni una mira de professionalizacion. Atal, pòdi seguir d’estagis que permeton l’insercion e la coneissença del mond occitan. Las possibilitats son pro diversificadas: escòlas, espacis publics o associatius.
 
Per fin d’afortir son accion de promocion de la lenga, lo departament d’occitan de la Facultat de Letras metèt en plaça de servicis tals coma l’associacion estudianta Med’òc dau Clapàs. Aquesta òbra per la socializacion e la valorizacion de la lenga occitana a l’Universitat e dins la vila de Montpelhièr. Recampa d’estudiants occitans mas tanben bretons e mai còrses a l’entorn de balètis, de talhièrs de tota mena, de conferéncias, e aquestes participan activament a las manifestacions de defensa de la lenga. A mai, existís tanben la “Bib’òc” que foguèt inaugurada e batejada Bibliotèca Robèrt Lafont lo 22 de novembre de 2019. Es especializada en literatura occitana e dobèrta a tot public. I se trapa tota mena d’òbras e de produccions que fan veire l’amplor de la civilizacion occitana.
 
Per mai d’entresenhas, podètz mandar un corric a: oc-info@univ-montp... o vesitar lo sit de l’UFR 2 de l’Universitat. Cal saber qu’aquela licéncia d’occitan en un an se pòt tanben trapar a l’Universitat Joan Jaurés de Tolosa.
 
 
 
 
Marilon Ferré
Estudianta d'occitan a l’Universitat Pau Valèri de Montpelhièr

 
 
        
    

fffff		fffff
	Jornalet a l'escòla Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a. Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…