Un tractament elaborat a Marselha pòrta d’espèrs per la garison de la Covid-19. S’agís de la combinason d’idroxicloroquina —un derivat de la cloroquina. Après un tractament fach sus un grop de malauts de la Covid-19 de Marselha per un grop dirigit pel professor Didier Raoult, especialista en malautiás infecciosas e director de l’IEU –Mediterranèa Infeccion de Marselha. Segon las conclusions publicadas divendres passat, aquela combinason de medicaments, que son coneguts e d’usatge comun, capitèt en sièis jorns a reduire entièrament la carga virala dins totes los pacients. L’estudi se publiquèt dins la revista International Journal of Antimicrobial Agents.
 
 
Las donadas de l’estudi
 
L’estudi de l’IEU – Mediterranèa Infeccion se basa sus un tractament administrat dempuèi lo començament de març a 36 pacients, dont 20 foguèron tractats amb d’idroxicloroquina e 16 foguèron de pacients contrarotlats mas non tractats. Demest los 20 tractats amb d’idroxicloroquina n’i aguèt 6 que recebèron tanben d’azitromicina.
 
Segon las donadas de l’estudi, los pacients contrarotlats mas non tractats, e los que foguèron tractats amb d’idroxicloroquina se comportèron de manièra desparièra a partir del tresen jorn. Lo seisen jorn, lo 70% dels pacients tractats amb d’idroxicloroquina s’èran garits del virus. Quant als contrarotlats mas non tractats, solament lo 12,5% èran garits. Totun, lo resultat mai estonant l’ofrissián los sièis pacients tractats simultanèament amb d’idroxicloroquina e d’azitromicina, pr’amor que los sièis se gariguèron del virus al cinquen jorn e presentèron una davalada fòrça notabla de la carga virala tre lo tresen jorn.
 
De soslinhar que s’agís d’una espròva facha sus de malauts e que, doncas, es pas brica un vaccin mas un tractament de garison. Cal tanben dire que lo resultat d’aquela espròva es pas pro conclusiu, a causa del petit nombre d’individus sus los quals s’es facha. Ça que la, es una nòva tota plena d’esperança, perque se se’n confirmèsse lèu l’eficacitat poiriá cambiar significativament lo cors de la pandemia actuala.
 
Los autors de l’estudi reconeisson, de fach, que la terapia s’es assajada sus plan pauques pacients, mas considèran que la situacion d’urgéncia sanitària e la clartat del resultat ne justifican la publicacion. Totun, divèrses expèrts an demandat de precaucion e lo govèrn francés a ordenat una espròva generala dins qualques centres per verificar se se pòt reproduire aqueles resultats endacòm mai e, per tant, ne validar las conclusions.
 
Jordania e l’estat de Nòva York o an començat d’ensajar
 
Dimenge, gaireben simultanèament, las autoritats sanitàrias de Jordania e de l’estat de Nòva York, als Estats Units, autorizèron de començar d’espròvas sus de pacients basadas sus aquela combinason de medicaments e los resultats del tractament de Marselha.
 
Als Estats Units, lo tractament es estat polemic perque lo president Donald Trump l’aviá recomandat sus Twitter dissabte. Lo comissari de l’Administracion Federala de l’Alimentacion e dels Medicaments, Stephen Hann, repliquèt al president en li demandant prudéncia fins que n’i aguèsse d’autras espròvas: “Es possible qu’aquò siá la potinga apropriada, mas es tanben possible qu’una dòsi inadeqüata faga mai mal que ben”, çò disiá Hann.
 
 
Un scientific reconegut e controversiat
 
Didier Raoult es lo director de l’IEU –Mediterranèa Infeccion, una unitat marselhesa de recèrca sus las malautiás infecciosas e tropicalas, e es tanben professor a l’Universitat d’Ais de Provença. Fa partida del conselh scientific creat per l’estat francés que trabalha per luchar contra la Covid-19 e es un dels scientifics mai mençonats dins las publicacions scientificas. En qualques escasenças a fach de declaracions polemicas qu’an fach d’el un personatge controversiat.