Actualitats
Van jutjar uèch èx-militars per l’assassinat de Víctor Jara
Trenta nòu ans puèi, un jutge chilen n’a ordenat l’arrèst
Lo Tribunal d’Apelacion de Santiago de Chile a ordenat la detencion d’uèch èx-oficials de l’armada chilena per l’assassinat del cantaire Víctor Jara, lo 16 de setembre de 1973, dins l’Estadi de Chile, qualques jorns après lo còp d’estat d’Augusto Pinochet. Lo jutge Miguel Vásquez a fach arrestar, trenta nòu ans puèi, lo Coronèl Hugo Sánchez Marmonti, lo Luòctenent Pedro Barrientos Núñez e sièis soldats de mai coma complices en l’assassinat de Jara.
Lo jutge a dich dins l’interlocutòria del jutjament dels èx-militars que, l’11 de setembre de 1973, de tropas de l’armada assetgèron l’Universitat Tecnica de l’Estat e i arrestèron de milièrs d’escolans, d’ensenhaires e de personal de l’institucion; demest eles i aviá Víctor Jara.
Vásquez a explicat que la majoritat dels arrestats d’alavetz foguèron menats a l’Estadi de Chile (nomenat Estadi Víctor Jara dempuèi 2003), que venguèt un camp de presonièrs, e foguèron susvelhats per divèrses efectius de l’armada. Jara foguèt torturat e executat lo 16 de setembre: recebèt quaranta quatre impactes de bala e lo sieu còrs foguèt lançat dins una carrièra de Santiago. La femna de Jara, Juana, reconeguèt lo còrs dins un tanatòri e, après l’enterrar, fugiguèt del país
En octòbre de 2009, Jara recebèt las funeralhas qu’aviá pas agut; i participèron de milièrs de personas.
Vidèos:
- Reportatge de Television de Catalonha: La “funa” de Víctor Jara
- Reportatge de Chilevisión: ¿Quién mató a Víctor Jara? (Qui matèt Víctor Jara?)
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Lo diluns 5 de seteme 2011 la rubrica gascona dens lo jornau "Sud-Ouest" (edicions d elas Lanas) escrivè: "Mans copadas. Pr’amor deus òrres eveniments de Siria on lo regime policièr a macat las mans deu caricaturista Ali Farzat lo 25 d’aost, d’auguns se son sovienut que, d’autes còps, « Los de Nadau », vaduts adara « Nadau », cantavan un « Auròst a Victor Jara ». Qu’èra de cap a 1976 e aquera canta estó inspirada per lo « golpe » (còp d’estat) deu Pinochet en seteme 1973 a Santiago deu Chile. Au miei de tan d’autes presonèrs politics, los militaris avèn gahat lo guitarista Victor Jara (1932-1973). Davant de’u tuar, que li avèn copat los dits entà que l’artista ne posquessi pas mei jogar... N’ic sèi pas exactament, mes benlèu que, pendent los hòrt nombrós concèrts seguits per horrèras ahuecadas, « Nadau » torna préner aquera esmaventa. O lavetz, que’us cau demandar…"
Rapelam qu’un « auròst » es un cant funèbre, un omenatge a un dispareishut. La tradicion d’aqueths planhs, au sens medievau deu mot, que demorèt longtemps viva en las Pirenèas, particularament hens la Vath d’Aspa dab Maria Asserquet dita « Maria Blanca », longtemps fixada a Òssa e morta en 1859. Aquèra aurostèra qu’èra capabla d’improvisar e d’esmàver parents, amics, vesins vienuts rénder las aunors a un defunt o a ua defunta. En medish temps, qu’èra un bèth exercici poetic. Com e disèvan « los de Nadau » dens l’ « Auròst a Victor Jara » : lo poèta n’es pas mort, pr’amor « son cant s’es escapat » …
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari