Lo Collectiu dels Presonièrs Politics Bascos (EPPK segon sa sigla en basco) mandèt un comunicat al jornal Gara, que lo publiquèt dissabte passat. Dins aquel comunicat, dison als govèrns espanhòl e francés qu’a l’ora d’ara, lo procès de patz al Bascoat “es en jòc”, un procès que, del sieu costat, ÈTA l’a començat en anonciar l’abandon definitiu de las armas.

L’EPKK, qu’amassa los presonièrs qu’an fach d’atemptats o que son en preson simplament per aperténer a la banda, assegura que s’i a pas un raprochament de presonièrs per “los menar totes al Bascoat”, se pòt metre en perilh “la viabilitat” del procès.
 
Dins aquel sens, l’ÒNU avisèt l’Estat espanhòl en 2004 que la politica de dispersion dels presonièrs, en los alonhant del país, incomplís las nòrmas minimalas pel tractament dels presonièrs.
 
Lo collectiu aprofiècha lo comunicat per far un bilanç de las accions qu’a fachas dins los darrièrs ans per fin de reclamar lo raprochament. E, en o ligant al resultat de las darrièras eleccions bascas, considèra que lo nòu lehendakari (lo president del govèrn autonòm basco) a “l’escomesa de respondre positivament als desirs e a las demandas ciutadanas”, en se referir a la desaparicion de la dispersion de presonièrs, al cambiament de la politica penitenciària e a l’afortiment del procès de patz.
 
L’EPPK ditz, a respècte dels govèrns espanhòl e francés, qu’insistisson “cègament” en contunhar installats dins “los biaisses de l’afrontament armat”, considèra que pretendon far venir la politica de las presons per “lo biais del blòc politic” e qu’o fan sens aver ja “cap de pretèxt, ni politic, ni solament legal”.