Lo procuraire general dels Estats Units, William Barr, anoncièt dijòus passat una operacion gaireben inedita en inculpar un cap d’estat estrangièr, Nicolás Maduro, e ofrir una recompensa de quinze milions de dolars per son arrestacion. Un tribunal de Nòva York acusa Maduro de “narcoterrorisme”, de trafec de cocaïna e d’emblanquiment d’argent. Los procuraires asseguran que lo president de Veneçuèla dirigissiá un cartèl de dròga tant abans coma après èsser elegit president de son país.
 
William Barr, que fa partida de l’executiu de Donald Trump, o diguèt dins una conferéncia de premsa ont tanben s’inculpava una dotzena d’autres membres del govèrn de Veneçuèla e qualques membres de las FARC colombianas.
 
De son latz, lo Departament d’Estat estatsunidenc emetèt un comunicat qu'anonciava qu’ “aquelas personas avián violat la fisança publica en permetre que de naviris de drògas partiguèsson de Veneçuèla” e en contrarotlar los avions que partissián del país.
 
Las acusacions contra los elegits veneçolans s’establisson en quatre proceduras diferentas, doas a Nòva Yòrk, una a Miami e una autra a Washington. Los Estats Units ofrisson fins a quinze milions de dolars a qui fornirà d’informacions que menen a l’arrestacion de Maduro e dels autres inculpats.
 
Los Estats Units dirigiguèron lo sosten internacional al còp d’estat mancat que l’ensagèt l’opausant Juan Guaidó, que se proclamèt president de Veneçuèla. Trump contunha de lo sosténer. Dins son darrièr discors sus l’estat de l’Union, lo president estatsunidenc convidèt Guaidó e acusèt Maduro d’èsser “un president illegítim” qu’es “brutal contra son pòble” e menacèt lo president veneçolan de li levar lo poder.