Lo govèrn de Portugal a decidit de regularizar sul pic totes los immigrants qu’avián pas encara lo permés de residéncia. La decision la prenguèt lo darrièr conselh dels ministres entre una tièra de mesuras socialas e economicas per atenuar las consequéncias de la pandemia del coronavirus que ten lo país dins l’estat d’urgéncia. Desenant, en Portugal, totes los immigrants que lor regularizacion èra a l’espèra an los meisses dreches que los ciutadans portugueses. Atal pòdon èsser sonhats pel servici de santat, pòdon signar de contractes d’emplec o sollicitar l’ajuda pels confinats a domicili e aver drech de recebre la prestacion de caumatge. La mesura favorís la nombrosa comunautat brasilièra e asiatica que trabalhan sustot dins los sectors de la construccion o de l’agricultura. Tanben se renovèlan automaticament totas las autorizacions qu’èran a expirar.
 
Lo ministre de l’administracion interiora, Eduardo Cabrita, o anoncièt atal: “En aquestes moments ven mai important de garentir los dreches dels pus febles, coma los immigrats. Assegurar l’accès dels ciutadans migrants a la santat, a la seguretat sociala, a l’estabilitat dins l’emplec e lo lotjament es un dever d’una societat solidària en temps de crisis”, çò rapòrta Público.
 
D’autre caire, lo govèrn portugués vòl resòlver un problèma burocratic creat pel quite estat d’urgéncia qu’a fach tampar fòrça servicis publics.