La neurològa e prèmi Nobel de medecina Rita Levi-Montalcini moriguèt ièr dimenge, a Roma, dins sos cent tres ans. Nascuda a Turin (Piemont) en 1909 en una familha josieva, comencèt d’estudiar la medecina quand aviá vint ans, mas la promulgacion de leis racialas l’empediguèt de contunhar la siá especializacion en neurologia e psiquiatria.

Pendent la guèrra, adobèt de laboratòris improvisats en cò sieu, ont faguèt d’experiéncias amb d’embrions de pol. Las siás descobèrtas la menèron en 1947 a l’Universitat Washington, a Saint Louis, als Estats Units, ont desvolopèt pendent trenta ans la carrièra de cercaira e de professora.
 
Rita Levi-Montalcini dirigiguèt tanben l’Institut de Biologia Cellulara del Centre Nacional de Recèrcas de Roma. En 1986, recebèt lo prèmi Nobel de medecina, amb Stanley Cohen, per las recèrcas sus la creissença de las cellulas neurologicas.
 
Lo 1r d’agost de 2001, foguèt nomenada senatritz a vida pel president italian d’alavetz , Carlo Azeglio Ciampi.
 
Levi-Montalcini refusèt de se maridar e d’aver una familha per poder dedicar la siá vida entièrament a la recèrca.
 
Las siás recèrcas son estadas fondamentalas per avançar dins l’estudi de malautiás cerebralas coma l’Alzheimer.