La cantadora curda Helin Bölek es mòrta après una cauma de la fam de 288 jorns. Bölek protestava contra la repression, la persecucion politica e la censura dirigidas pel president del país, Recep Tayyip Erdoğan. Lo govèrn turc enebiguèt los concèrts de sa banda nomenada Grup Yorum, a causa del messatge esquerrista de las paraulas de sas cançons. Un autre membre del grop, İbrahim Gökçek, es tanben en cauma de la fam.
 
La revendicacion dels caumaires es que s’arrèste la persecucion del grop, que se libere los presonièrs politics e que i aja pas pus de contraròtles e detencions contra los centres culturals del país. Sus Twitter, lbanda a plangut que s’agissiá “pas d’exigéncias de tan mal complir. “Lo faissisme del partit Justícia e Desvolopament a causat sa mòrt”, çò an dich en referéncia al partit d’Erdoğan. De son costat, Gökçek a dich net e clar: “Avètz tuat una gojata de vint e uèch ans”. Lo musician, el, es en cauma de la fam dempuèi 292 jorns e sa santat perilha.
 
De son latz, lo govèrn turc assegura que la banda Grup Yorum aviá de ligams amb lo partit Front Revolucionari de Liberacion Popular (DHKP-C) qu’ Erdoğan lo considèra coma una organizacion terrorista.
 
Lo grop Grup Yorum lo fondèt en 1985 a Istambol d’estudiants que volián reagir per mejan de la musica al còp d’estat militar de 1980. Al començament, i aguèt d’influéncias de Ruhi Su, Mahzuni Şerif, Inti Illimani, Víctor Jara, Quilapayún e Theodorakis, e foguèt format “per èsser la votz de la tèrra e dels pòbles d’Anatolia”. Dins los ans 1990 venguèt un grop fòrça popular. La banda es conegua per sas revendicacions en favor del pòble curd e combina las tradicions curda e turca, amb de paraulas contra la gentrificacion, las politicas d’Ankara e las tragèdias socialas que las patisson los obrièrs. Avián fach de concèrts en Alemanha, Àustria, Austràlia, França, Itàlia, los Païses Basses, Belgica, Danemarc, lo Reialme Unit, Grècia e Siria.