Dotze mètges e universitaris de las santat, dont dos èx-ministres franceses de la santat an lançat un manifèst qu’exigís del govèrn de Philippe que modifique la lei per metre l’idroxicloroquina a la disposicion immediata de totes los mètges de l’estat francés, coma se fa ja en Itàlia. Lo manifèst es entitolat “Perdam pas lo temps” e demanda que los professionals pòscan administrar lo medicament als pacients tre lors primièrs simptòmas de Covid-19. Los signataris afirman que dins los estadis avançats de la malautiá lo medicament pèrd d’eficacitat e, per tant, que cal facilitar que se pòsca administrar del biais pus rapid possible sense trebucs burocratics.
 
A mai, demandan que l’estat faga de comandas per que i aja un estòc d’idroxicloroquina car tre que se’n confirmarà l’eficacitat i aurà la possibilitat que “demorem pas sens tractament”.
 
Los dos èx-ministres en question son Michèle Barzach, qu’o foguèt jos la presidéncia de François Mitterrand, e l’ancian cònsol de Tolosa Philippe Douste-Blazy, que foguèt ministre jos la presidéncia de Jacques Chirac e que, a mai, es professor de santat publica e epidemiològ. Demest los signataris i a de noms de referéncia coma lo cap de las malautiás infecciosas de l’Espital de Garches, Christian Perronne.
 
 
A Marselha, lo taus de mortalitat es fòrça pus bas
 
Los signataris soslinhan qu’a Marselha lo taus de mortalitat es fòrça pus bas demest las personas espitalizadas que non pas dins la rèsta de l’estat francés. L’usatge d’aquel medicament aviá fach polemica après se n’aguèt esprovat l’eficacitat dins la ciutat mai granda d’Occitània per un grop dirigit pel professor Didier Raoult, especialista en malautiás infecciosas e director de l’IEU –Mediterranèa Infeccion de la Ciutat Focèa.
 
Lo manifèst argumenta tanben que las autoritats italianas e estatsunidencas an pres “de mesuras terapeuticas dins aquel sens”. Lo 17 de març de 2020, l’Agéncia Italiana del Medicament autorizèt la prescripcion d’idroxicloroquina de part dels mètges generalistas a causa de l’urgéncia sanitària. Dotze jorns pus tard, après l’aprobacion de l’Agéncia dels Medicaments dels Estats Units, lo Departament de la Santat e dels Servicis Umans metèt aquel medicament a la disposicion de las farmacias dels espitals dels cinquanta estats.
 
Dins l’estat francés, a l’ora d’ara, aqueles tractaments se pòdon solament dispensar dins los espitals e jos la supervision d’un mètge especialista en reumatologia, medecina intèrna, dermatologia, nefrologia, neurologia o pediatria, segon las recomandacions del Conselh Superior de la Santat Publica.