Lo cònsol màger de Sant Breç (Montpelhierenc), Laurent Jaoul, elegit al primièr torn de las eleccions municipalas lo 15 de març passat, demanda l’anullacion de sa pròpria eleccion en tot denonciar una “mascarada” politica dins la crisi sanitària que sèm a patir, çò rapòrta France 3.
 
“Tròbi escandalós qu’un primièr ministre prenga la paraula per demandar als franceses de se rendre pas pus dins los luòcs publics e que, dins lo meteis temps, se demande als franceses de se rendre dins aqueles luòcs per anar votar. Las gents avián la paur al ventre”, çò ditz Jaoul en tot estimar que la sinceritat del vòte es estada “alterada”.


Un 82,71% d’abstencion
 
A Sant Breç, suls 2424 inscriches, solament 300 personas anèron votar aquel 15 de març. Aquel taus d’abstencion d’un 82,71% es lo pus bas d’Occitània e de tot l’estat francés. Lo quite elegit en question se desplacèt pas per anar votar e quitament publiquèt un vidèo ont demandava a sos conciutadans de se gandir pas a las urnas.


“Solidaritat envèrs totas las victimas del coronavirus”

E de fach, après la jornada electorala, mai d’un assessor foguèron infectats pel nòu coronavirus e d’unes son mòrts. “A Sant Breç, un assessor es estat testat positiu a la Covid-19, qualques jorns après aquel primièr torn comencèt de sentir de simptòmas”, çò explica Jaoul en tot solinhar que vòl denonciar “aquela mascarada” tanben “per solidaritat envèrs totas las victimas del coronavirus”. L’elegit lengadodian fa partida dels 50 cònsols màgers franceses qu’an mandat una letra dobèrta al president francés Emmanuel Macron per exigir l’anullacion del primièr torn de las municipalas.