Alara que sembla mai que probable que la sason tretzista s’arrèste en Occitània e Catalonha, la question de la seguida demòra pausada pel Championship, la Superliga e l’NRL amb tres preocupacions: la santat dels jogaires (e dels publics), la reorganizacion dels calendièrs e las questions financièras.
Superliga: l’espèr d’una represa
Dins los clubs de Superliga, los jogaires accèptan de baissas dels salaris. La data de represa es en question e dependrà per part de la decision de las autoritats governamentalas. Aprèp, i aurà pas de Dimenjada Magica en Superliga e pas de Summer Bash en Championship. Probable que la finala de la Cup se poirà pas debanar lo 18 de julh a Wembley. I auriá pas de davalada en fin de sason, mas un o dos clubs de Championship montarián? Se la competicion es butada cap a la tardor, la virada dels Cangorós en Anglatèrra se farà pas.
Per protegir los jogaires, l’entraïnaire de Toronto prepausa la represa amb de partidas d’una ora en quatre quarts-tempses amb 20 jogaires sul fuèlh.
Austràlia: la direccion de l’NRL en question
La crisi remet en causa lo foncionament de l’NRL als efectius administratius pletorics. Una estructura qu’a pas mes de moneda dempuèi dos ans dins los fonzes destinats a la retirada dels jogaires e al sosten als clubs.
Se parla de butar lo campionat cap a la tardor: de recampar los jogaires sus una illa a la debuta de l’estiu; de demesir lo nombre de rescontres; de faire jogar las partidas sens public, per poder tocar la moneda necessària de las difusions televisualas… Lo pagament dels jogaires es assegurat pels dos meses a venir; aprèp, serà en foncion de la represa.
Per faire d’estalvis, lo bunquèr de Sydney ont se jutja totas las accions vidèo seriá suprimit per ne tornar a un arbitratge vidèo dins cada estadi: çò que costariá mièg prètz.
En resumit, se parla fòrça. L’actualitat e lo contraròle de la pandemia determinaràn la seguida de las sasons esportivas.
Lo XIII en imatges
Aquela interrupcion de las competicions mena los afogats a s’achofir suls canapès e a tornar gaitar TV e Internet.
BeInSport torna passar las finalas d’NRL de 2012 a 2019 aquesta setmana. A partir del site treizemondial.fr, se pòt tornar veire lo Dragon-Wigan de Barcelona (comentat en catalan) , la finala de 2017 de la Copa del Mond de XIII-cadieral, los tèstes Anglatèrra-Nòva Zelanda de la tardor, e plan d’autras partidas. Se pòt veire tanben de partidas sus la cadena de la federacion anglesa OurLeague, sul sit dels Dragons … Vos cal pas mancar de gaitar lo documentari sus la victòria de 2018 en Cup: De Sang et de Feu.
Pipeta, lo mai grand arrièr del XIII
La federacion internacionala es a formar l’esquipa bèla dels 125 ans de nòstre espòrt. An començat per la designacion del melhor arrièr. Un còp de mai, al grand plaser e a la granda satisfaccion dels occitans e dels catalans, es Puig-Aubèrt, escaissat Pipeta, qu’es estat nomenat. Lo sovenir de la virada als Antipòdes de 1951 es encara per de temps l’atge d’aur del XIII nòstre!
Alan Roch
Tornatz veire lo Dragon-Wigan de Barcelona (comentat en catalan)
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a periodistas de dretas que disen que Pedro a posat per davant l'economia davant la salut, e es pas vertat. Primier lo pp diguet que lo govern de progrés no feia res e lo Govern alara apliquet las normas extrictas de confinament, situant l'economia espanyola sota minims. Ara disen lo mateis, aprés d'alongar una setmana mai lo confinament. Casado dirà deman que lo Govern a duit malament l'economia. Ipocritas !. La dreta representa a las personas ricas que no tenen problemes si estan tres o mai setmanas sense trabalhar, però los trabalhadors sobretot los autonoms se no trebalhan no tenen per poder menjar. I a canals fachas que disen que si donan 1'5 euros a Caritas, coma si fos la solucion, però los trabalhadors no son paubres e no los an de tractar coma tal. Las ajudas qu'an de cobraran los autonoms per estar quasi un mes sense trabalhar, o cobraran non se sap pas quan, dos ,tres meses o mai.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari